PatrolPH

'Tipid-tipid na naman': Mga kutsero problemado sa limitadong negosyo sa Intramuros

ABS-CBN News

Posted at Mar 17 2021 02:50 PM

'Tipid-tipid na naman': Mga kutsero problemado sa limitadong negosyo sa Intramuros 1
Ang kutserong si Eseng Cruz, problemado kung saan kukuha ng pangkain sa araw-araw ngayong isinara ang ilang pasyalan sa Intramuros sa Maynila sa harap ng pagsipa ng bagong COVID-19 cases. ABS-CBN News

MAYNILA - Dumadaing ang ilang kutsero sa Intramuros sa Maynila sa muling pagsasara ng ilan sa mga pasyalan sa lugar, sa harap ng pagsipa ng COVID-19 cases. 

Pebrero 17 nang muling buksan sa mga lokal na turista ang Intramuros. Ngayon, sarado muna ulit sa mga turista ang Fort Santiago, Casa Manila, at Baluarte San Diego. 

Ang kutserong si Eseng Cruz, problemado kung saan kukuha ng pangkain sa araw-araw. 

"Eh tiyaga-tiyaga lang po. Medyo may sumasakay kung minsan. Minsan, wala. Akala nga namin nung nakaraan, diretso na yung paghahanapbuhay namin eh,” ani Cruz. 

“Ngayon, tipid na naman kami. 'Yung ulam sa umaga, hanggang gabi na,” dagdag niya.

Watch more on iWantTFC

Pero ang alaga niyang si Cardo, hindi puwedeng magutom. 

"Eh medyo, sa kabayo, hindi namin puwedeng gutumin 'yan, kasi mawawalan ng katawan. Kailangan bago tao, kabayo muna. Kasi ang tao, nakapagtitiis. Ang kabayo, hindi,” ani Eseng. 

Una nang ipinaliwanag ng pamunuan ng Intramuros na bahagi ang pagsasara ng ilang pasyalan sa kanilang “voluntary precautionary measure” o pag-iingat laban sa pagkalat ng COVID-19. 

Tatagal ang pansamantalang pagsasara hanggang Marso 31, 2021. 

— Ulat ni Johnson Manabat, ABS-CBN News
 

Bisitahin ang Patrol.PH para sa iba pang mga balita.