PatrolPH

Ilang convenience store at kainan, ipinasara dahil sa curfew sa Muntinlupa at Las Pinas

Anjo Bagaoisan, ABS-CBN News

Posted at Mar 17 2021 05:30 AM

MAYNILA - Sinita ng mga pulis ang pagpapanatiling bukas ng ilang establishimento, lalo na ang mga 24-hour convenience store, habang oras ng curfew sa Muntinlupa at Las Pinas City Martes ng gabi.

Pinasara nila ang mga nadatnang bukas na tindahan sa gitna ng pagpapatupad nila ng ikalawang gabi ng unified curfew sa Metro Manila.

Kinausap ang mga nagtatrabaho sa mga convenience store na magpatay ng ilaw at tumigil muna ng operasyon. Wala namang kumontra rito

Kasama rin sa mga pinasara ang mga kainan na nagpapa-dine-in pa rin sa kanilang puwesto.

Ayon kay Southern Police District director Brig. Gen. Eliseo Cruz, pinuntirya ang mga convenience store dahil hindi sila nakalista sa mga pinapayagang magbukas sa oras ng curfew, batay sa ordinansa ng Muntinlupa City para sa panibagong curfew.

Aniya, hindi umano sila maituturing na “fast food” na isa sa exempted o hindi sakop ng curfew.

Samantala, inanunsyo ng Las Piñas local government sa social media page nito na kabilang ang 24-hour convenience stores sa mga pinapayagang magbukas sa lungsod lagpas alas-10 ng gabi.

Klinaro naman ni Cruz na inabisuhan niya ang mga hepe ng pulisya sa mga lungsod na sakop ng SPD na klaruhin ito sa kani-kanilang lokal na pamahalaan.

Ayon din sa pulis, pwede namang amyendahan ang mga ordinansa para isama ang mga convenience store sa mga exempted na establishimento.

Pero hangga’t wala pang paglilinaw, patuloy ang pagpapatupad nito sa mga naturang lungsod. 

Bisitahin ang Patrol.PH para sa iba pang mga balita.