PatrolPH

Bilang ng mga nag-Baclaran Day bumaba sa gitna ng pagdami ng COVID-19 cases

ABS-CBN News

Posted at Mar 17 2021 11:11 AM

Bilang ng mga nag-Baclaran Day bumaba sa gitna ng pagdami ng COVID-19 cases 1

Karaniwang bumababa ang dami ng nga nagsisimba sa kalagitnaan ng buwan sa Baclaran Church tuwing Baclaran day. Pero tumaon din ang mas kaunting nagsisimba sa pagdami ng COVID-19 cases sa Metro Manila.

Kumaunti ang bilang ng mga nagsisimba sa Baclaran Church sa Parañaque City ngayong Baclaran Day, sa gitna ng patuloy na pagdami ng kaso ng coronavirus disease (COVID-19) sa Kamaynilaan. 

Karaniwang bumababa ang dami ng nga nagsisimba sa kalagitnaan ng buwan, pero tumaon din ito ngayon kung kailan patuloy ang pagdami ng kaso ng COVID-19 sa lugar. 
 

Kung dati puno ng tayuan ang loob ng simbahan at nagkakapila sa mga marker ng tao sa harap ng gusali, mistulang ordinaryong araw ito dahil sa pagbawas ng mga tao.

Bukod sa pagdami ng kaso, may epekto rin ang pagbabalik ng curfew kaya ang kadalasang paikot na pila sa labas ng compound para sa unang misa ay maiksi lang.

Gayunpaman, patuloy pa rin ang pagdating ng tao sa pagitan ng mga misa. Marami pa sa kanila ay mga senior citizen.

Sabi ng ilang nagsimba gaya nina Jun Rebacto at Evelyn Rivera, buo ang loob nilang dumalo sa kabila ng posibleng panganib.


"Nakagawian na namin magsimba tuwing Wednesday. Bahala na po si Lord. Nagdadasal na lang kami na malayo kami sa ganoong sakuna ngayon. Sana matapos na ang pandemic na ito at makarekober na tayo," ani Rebacto. 

"Dasal naman...Para sa kaligtasan para sa lahat, sa mga anak ko, nanay ko. Bahala na po ang Diyos sa atin. ‘Yon lang ang hiling ko sa Panginoon," ani Rivera. 

Nananatili ang 3,000 person capacity ngayon ng compound, pero ayon kay Fr. Victorino Cueto, ipinatutupad na rin sa simbahan ang patakaran ng pagbabawal sa menor de edad na lumabas.

Sa ngayon, may 631,320 nang kumpirmadong kaso ng COVID-19 sa buong bansa. 

-- Ulat ni Anjo Bagaoisan, ABS-CBN News

Bisitahin ang Patrol.PH para sa iba pang mga balita.