PatrolPH

COVID-19 variant na nadiskubre sa Pilipinas mas nakahahawa ba?

ABS-CBN News

Posted at Mar 15 2021 07:06 PM | Updated as of Mar 15 2021 09:56 PM

COVID-19 variant na nadiskubre sa Pilipinas mas nakahahawa ba? 1
Jonathan Celllona, ABS-CBN News/File

MAYNILA (UPDATE) — Wala pang ebidensiya para masabing mas nakahahawa ang nadiskubreng variant ng COVID-19 virus sa Pilipinas, na ngayon ay tinatawag na P.3 variant, sabi ngayong Lunes ng Philippine Genome Center (PGC). 

Sabi sa TeleRadyo ni PGC executive director Cynthia Saloma, patuloy pang pinag-aaralan ang karakter ng local variant.

"Naibalita sa ibang bansa na meron siyang increased transmissibility. So sa Pilipinas kailangan pa natin ng actual figures at pinag-aaralan pa po 'yan ng DOH (Department of Health)... para meron tayong actual values kung totoo ba talagang increased transmissibility at by how much kasi wala nga tayong data diyan," paliwanag ni Saloma.

Watch more News on iWantTFC

Maaalalang lumabas sa mga ulat sa Japan na isang biyahero na galing sa Pilipinas ang nakitaan ng bagong variant.

Sabado nang kumpirmahin ito ng DOH.

Dagdag pa ni Saloma, natural lang para sa isang virus na mag-mutate at hindi laging pinapalala ng mutation ang bagsik ng isang virus.
     
Ang mahalaga aniya ngayon ay paigtingin pa ng mga lokal na pamahalaan ang contact tracing para hindi na kumalat ang COVID-19 variants.

"Most likely nangyayari itong mga ganitong maraming jump ng mutations sa mga pasyenteng may chronic illness, immunocompromised sila. Nagmu-mutate sa katawan nila na hindi masyadong nakaka-fight ang immune system nila kaya very important na i-control ang transmission," giit ni Saloma.

Sinegundahan naman ito ni Dr. Eva Cutiongco-de la Paz, executive director ng National Institutes of Health ng UP Manila.

"Ang virus constantly nagkokopya siya para dumami siya. Sa pagkopyang 'yun puwedeng magkaroon ng typo errors. Those typo errors, 'yun ang tinatawag nating mutation. Puwedeng may mutation na wala namang epekto pero may mutation na tawag natin ay deleterious o nakakasama," paliwanag pa ni De la Paz.

Pebrero nang ma-detect ng mga eksperto sa bansa ang sinasabing "mutations of concern" sa ilang mga pasyenteng may COVID-19 sa Central Visayas.

Sa ngayon nasa 98 na kaso na sa Pilipinas ang nakitaan ng P.3 variant. Marami dito ay mula Central Visayas. 

Sa huling tala ng DOH, nasa 626,893 na ang dinapuan ng COVID-19 sa Pilipinas.  

RELATED VIDEO:

Watch more News on iWantTFC
Bisitahin ang Patrol.PH para sa iba pang mga balita.