Lalaking natagpuang patay sa puno posibleng nagpakamatay

Gracie Rutao, ABS-CBN News

Posted at Mar 07 2017 12:19 PM | Updated as of Mar 07 2017 04:16 PM

A man's cadaver was found hanging in a mango tree in Lubao, Pampanga. Gracie Rutao, ABS-CBN News

Inilibing na nitong nakaraang lingo ang mga labi ng lalaking natagpuang nakasabit sa mga sanga ng puno ng mangga sa Barangay San Francisco, Lubao, Pampanga.

Naniniwala ang live-in partner nito na sinadyang magpakamatay ng kinakasama nang siya'y palayasin matapos madiskubre na di umano'y ginagalaw niya ang 11-anyos na babaeng anak mula pa noong Grade 4 ito.

"Sinadya niya 'yan....kaya nga pinaalis ko para wala nang mangyari sa kanya...baka anuhin pa siya ng pamilya ko kaya pero hindi kayang gawin yan ng pamilya ko,” sabi ng live-in partner ng biktima.

Ayon sa pulisya, nakikitang posibleng anggulo sa krimen ang suicide.

"Kung inakyat man yan matutukod nya yung kamay makakapalag at mahuhulog sya... nakonsensya yan dahil nga ni-rape yung anak,” sabi ni Police Superintendent Michael Masangkay.

Pinatotohanan din ng medico-legal results na nagalaw ang 11-anyos na bata.

Pero para sa pamilya ng lalaki, hustisya ang hiling nila.

Ngayong linggo inaasahang lalabas ang resulta ng autopsy ng bangkay nang matukoy ang tunay na dahilan kung ano ang ikinamatay at bakit napunta sa puno ng manggahan ang biktima.

Bisitahin ang Patrol.PH para sa iba pang mga balita.