PatrolPH

Pagbabakuna kontra COVID-19 umarangkada na rin sa Antipolo

ABS-CBN News

Posted at Mar 04 2021 02:39 PM | Updated as of Mar 04 2021 07:15 PM

Pagbabakuna kontra COVID-19 umarangkada na rin sa Antipolo 1
Tinurukan ni dating Antipolo Mayor Jun Ynvares ng COVID-19 vaccine si Antipolo City Health Officer Dr. Concepcion Garcia Lat. Bianca Dava, ABS-CBN News

MAYNILA (UPDATE) – Nagsimula ngayong Huwebes ang pagbabakuna kontra COVID-19 sa Antipolo City, kung sana 100 health care workers mula sa mga pampublikong ospital ang nakatanggap ng bakunang gawa ng Chinese firm na Sinovac.

Unang naturukan sa ceremonial rollout si Dr. Concepcion Garcia Lat, ang city health officer. Si dating Antipolo Mayor Jun Ynares, na isang doktor, ang nagbigay sa kaniya ng bakuna.

Ayon kay Ynares, na ngayo’y public information officer ng lungsod, higit 500 health care workers ang nagpahayag ng kagustuhang mabakunahan gamit ang CoronaVac ng Sinovac, pero nasa 300 doses pa lang ang kanilang natatanggap.

Tiniyak naman daw ng national government na mabibigyan pa sila ng supply ng bakuna sa mga susunod na linggo. 

“Nakakuha naman tayo ng assurance sa national [government] na ito’y madadagdagan pa. Naintindihan natin na ‘di lang Antipolo ang kanilang tinututukan. We’re willing to wait,” sabi ni Ynares.

As of 6 p.m. nitong Miyerkoles, ika-3 ng Marso, nakapagtala na ng 4,557 confirmed COVID-19 cases ang lungsod, bagama't 117 lamang dito ang active cases.

Nagsimula nitong Lunes ang COVID-19 vaccination program ng gobyerno sa ilang ospital sa Metro Manila, na sinundan rin ng rollout sa ibang bahagi ng bansa.

Ito’y matapos dumating noong Linggo ang nasa 600,000 doses ng CoronaVac na donasyon ng Chinese government.

Watch more on iWantTFC

Dumating na rin sa San Pablo City District Hospital sa Laguna ang 400 doses ng Sinovac.

Sa Sabado babakunahan ang higit 300 medical frontliners at mga empleyado ng ospital.

Ayon kay testing czar Vince Dizon, patuloy na dumarami ang nagpapalistang health care worker para magpabakuna.

Sa pag-arangkada ng COVID-19 vaccination program sa mga probinsiya, sana raw ay mas mahikayat ang publiko na magpabakuna rin.

Ayon pa kay Dizon, may mga ospital na tumaas ang demand para sa bakuna.

Isa na rito ang Dr. Jose N. Rodriguez Memorial Hospital sa Tala, Caloocan na humiling pa ng dagdag na 1,000 doses ng Sinovac vaccine para sa kanilang mga empleyado.

Sa Lung Center of the Philippines, dumami na rin ang health care workers na nagbago ang isip at nag-walk-in para magpabakuna.

Inaasahan namang darating ngayong gabi ng Huwebes sa Pilipinas ang 487,200 doses ng bakuna ng AstraZeneca mula sa COVAX Facility.

Target ng gobyernong mabakunahan ang lahat ng health workers ngayong Marso, at ang kabuuang 70 million ngayong taon para magkaroon ng herd immunity laban sa coronavirus.

-- Ulat ni Bianca Dava, ABS-CBN News

RELATED VIDEO:

Watch more on iWantTFC
Bisitahin ang Patrol.PH para sa iba pang mga balita.