PatrolPH

COVID-19 vaccination ng frontliners patuloy; dagdag Sinovac doses inaasahan ngayong Marso

ABS-CBN News

Posted at Mar 03 2021 02:29 PM | Updated as of Mar 03 2021 08:45 PM

COVID-19 vaccination ng frontliners patuloy; dagdag Sinovac doses inaasahan ngayong Marso 1
Si Health Secretary Francisco Duque III ang nagturok ng Sinovac vaccine kay EAMC chief Dr. Alfonso Nuñez. Screengrab

MAYNILA (3rd UPDATE)- Patuloy ang pagbabakuna kontra COVID-19 sa mga health worker sa iba't ibang ospital sa bansa Miyerkoles, habang inaaasahan ang dagdag pang mga doses ng Sinovac vaccine para mas maraming frontliner ang mabigyang proteksyon laban sa sakit, ayon sa health authorities. 

Pagbabakuna sa East Avenue Medical Center

Nagsimula na ang pagbabakuna sa East Avenue Medical Center sa Quezon City ngayong Miyerkoles sa pagdating ng kanilang suplay ng CoronaVac vaccines mula Sinovac. 

Magmula alas-12 ng tanghali ng Miyerkoles, nasa 144 staff na ng EAMC ang nabakunahan.

Si Health Secretary Francisco Duque III ang nagturok sa medical chief ng ospital na si Dr. Alfonso Nuñez at isang nurse na si Rosemarie Reyes sa "ceremonial vaccination" ng pasilidad. 

Hangad ni Nuñez na maprotektahan ng mga bakuna ang health care workers habang patuloy silang nagsasalba ng buhay ngayong COVID-19 pandemic. 

Watch more on iWantTFC

Ibinahagi niya rin ang kaniyang naramdaman matapos turukan ng Sinovac vaccine. 

"Balewala. Parang simpleng bakuna lang. Kagaya ng mga ibang bakunang na-receive ko sa aking buhay. Kaya hinihikayat namin ang lahat ng health care workers na samantalahin na itong Sinovac, iyong vaccine na available para mabigyang proteksyon ang lahat ng health care workers,” ani Nuñez. 

Para kay Duque, maituturing na “influencer” ang mga medical frontliner na nanguna sa pagpapabakuna kontra COVID-19 sa gitna ng mga agam-agam tungkol dito. 

"Ang talagang influencers ay ang hospital chiefs. Gaya nina Dr. Sitoy Nuñez ng EAMC, Dr. Gap Legazpi ng PGH, si Dr. Famaran ng JNRMC, in fact pati FDA Director General Eric Domingo. So maganda ito, within the sector, iyong mga influencers sila ang mauuna,” ani Duque. 

Aminado si Duque na 17 porsiyento lang ng 3.4 milyong health care workers ang maaaring masaklaw ng 600,000 doses ng Sinovac na dumating kamakailan kaya aniya ginagawa ng pamahalaan ang lahat upang matugunan ang pangangailangan sa pagbabakuna. 

Dagdag ni Duque, posibleng sa ika-3 hanggang ika-4 na linggo ng Marso dumating ang nasa 1 milyong doses ng Sinovac. 

Watch more on iWantTFC

 Pagbabakuna sa Caloocan City

Pumila rin para magpabakuna kontra COVID-19 ang ilang health worker sa Dr. Jose N. Rodriguez Memorial Hospital o Tala hospital ang ilang dating tumangging magpaturok sa bakuna ng Sinovac, ayon sa hepe ng ospital ngayong Miyerkoles. 

Ayon kay Medical Center Chief Alfonso Famaran Jr., nagbago ang isip ng ilang health worker sa ospital matapos ang malawakang information dissemination kaugnay sa naturang bakuna. 

Sa halos 2,000 personnel ng Tala, kulang 200 lang ang nagsabing magpapaturok sila ng COVID vaccine ng Sinovac bago ito dumating sa bansa. Pero noong inaasahang Pfizer ang darating na bakuna, nasa 95% ang gustong magpabakuna.

“Nasa 60 to 70 percent [ang] dating [nag-no] na nag-yes na magpapa-vaccinate,” ani Famaran.

“Medyo malawak ‘yung information dissemination dito sa ospital pertaining to Sinovac, pertaining to the information with regard to the side effects, kaya na engganyo ‘yung [mga nag-no] na mag-yes for Sinovac inoculation,” paliwanag niya.

Sa 3 araw na rollout ng Sinovac COVID-19 vaccine sa Tala hospital, nasa 221 na ng paunang 300 doses ang naiturok sa personnel nito. Nasa 21 minor adverse events naman ang naitala matapos mabakunahan.

May 3 vials naman daw, na katumbas ng 3 doses, ang itinuturing na wastage.

Kung madaragdagan umano ang gustong magpabakuna, pwedeng humingi ng dagdag na dose ng COVID-19 vaccine ang ospital. 

Kung hindi naman mauubos sa Biyernes ang doses ng bakuna na ibinigay sa ospital, sabi ni Famaran, magtatawag na sila sa substitution list.

“‘Yung quick substitution list, just in case lang na hindi namin maubos’yung vaccines good for 300 persons, by Friday. Kung may natitirang vaccines,” aniya.

 Pagbabakuna sa Valenzuela 

Sinimulan na rin ang pagpapabakuna sa Valenzuela City. 

Sa dalawang ospital nagsagawa ng inoculation ang LGU, kung saan nasa 200 vaccines ang nagamit. 

Unang naturukan si Valenzuela City Medical Center director Dr. Ma. Estrella Litam ng bakuna. Aniya, wala naman daw siyang naranasang side effects. 

Ayon kay COVID-19 testing czar Vince Dizon, tumaas ang kumpiyansa ng publiko sa Sinovac vaccines, na napapaulat na may mas mababang efficacy rate kung ikukumpara sa ibang brand. 

"Napakaganda tumataas ang kumpiyansa natin," ani Dizon, na dumalo sa ceremonial vaccination. 

Ang bawat nabakunahan ay mabibigyan ng vaccination "passport" at pin. 

Aabot naman sa 50 bakuna ang na-administer sa medical frontliners sa Valenzuela Emergency Hospital.

Watch more on iWantTFC

Private hospitals 

Umarangkada na rin ang pagbabakuna sa ilang pribadong ospital, gaya ng St. Lukes’ Medical Center, Medical City, at Cardinal Santos medical Center. 

Aabot sa 5,000 empleyado ng St. Luke’s sa Taguig at Quezon City ang nakatakdang lumahok sa vaccination program sa ngayon. Sa ngayon, nasa 50 porsiyento na ng healthcare worker at staff ng ospital ang nagpakita ng kagustuhang magpabakuna. 

Si St. Lukes Medical Center President and CEO Dr. Arturo Dela Peña, na nagka-COVID-19 na noon, ang unang binakunahan sa ospital. 

Aabot naman sa 61 porsiyento ng mga doktor sa Cardinal Santos Medical Center sa San Juan City ang pumayag sa pagpapabakuna. Aabot sa 300 doses ang dinala sa nasabing ospital. 

Nagsimula na rin ang pagpapabakuna sa The Medical City sa Pasig City, kung saan 4,000 doses ang kanilang natanggap. 

 Pagbabakuna sa RITM

Samantala, umarangkada na rin ang pagbabakuna sa Research Institute for Tropical Medicine gamit ang inisyal na 300 CoronaVac vaccines ngayong Miyerkoles. 

Dalawang araw gagawin ang pagbabakuna sa mga nasa 300 empleyado ng tanggapan. 

Sa pahayag, sinabi ng RITM na nasa 150 health worker ang nabakunahan ngayong MIyerkoles, habang may 120 namang pumirma para mabakunahan sa Huwebes, Marso 4. Ang 30 pang natitirang slot, sisikapin umano ng RITM na mapunan bago matapos ang Marso 4. 

Pawang mga pre-registered ang mga mababakunahan. May iilan din umanong nakaranas ng adverse reaction gaya ng pagkahilo pero wala pa sa ngayong mga malubhang adverse reaction na napapaulat. 

“As health care practitioners in the front line of our nation’s fight against the COVID-19 pandemic, it is our duty to prioritize our health. Being healthy ensures that we are more than able to serve the Filipino people,” ani RITM director Celia Carlos. 

 Pagbabakuna sa NKTI

Watch more on iWantTFC

Nasa 150 health care workers naman ng National Kidney and Transplant Institute (NKTI) sa Quezon City ang inaasahang matuturukan ng Sinovac vaccine ngayong Miyerkoles.

Ayon kay Dr. Rosemari Liquete, executive director ng NKTI, ito ang bilang ng mga kawaning nagpalista para magpabakuna. 

Kinabibilangan umano ito ng mga doktor, nurse, security personnel, nursing assistants at iba pa.

“Dahil ang ibinigay na dose pa lang sa amin is 300, sabi namin mauubos namin 'yung 150 persons today. Meron kaming 5 stations dito sa aming malaking gym,” sabi ni Liquete sa panayam sa TeleRadyo.

Ang NKTI ay may 2,400 na health care workers. Bagama't marami ang nagpa-register para magpabakuna, normal lang aniya para sa iba ang magkaroon ng agam-agam at naisin na maghintay na muna.

Hindi naman makakasama si Liquete sa mga babakunahan gamit ang Sinovac dahil lampas na ang edad niya sa age group para dito. 

Samantala, ibinahagi rin ni Liquete na itinatayo na ngayon ng pansamantalang COVID hemodialysis facility na magkakaroon ng 20 stations. Inaasahan aniya itong matatapos sa Abril.

“Ang problema namin noon maraming nagda-dialysis na COVID patient,” sabi niya.

Dagdag niya na ang pansamantalang pasilidad ay itinatayo sa tulong ng Inter-Agency Task Force at Department of Public Works and Highways.

— May mga ulat nina Raffy Santos, Vivienne Gulla, Jacque Manabat, Jorge Cariño, Bianca Dava, Johnson Manabat, at Arra Perez, ABS-CBN News
 

Bisitahin ang Patrol.PH para sa iba pang mga balita.