Ilang bus companies wala pa ring biyahe; mga kolorum, nagsusulputan

ABS-CBN News

Posted at Feb 23 2021 11:31 AM | Updated as of Feb 23 2021 11:47 AM

Watch more in iWantTFC

MAYNILA - Marami pa ring mga lugar ang wala pang biyahe ng mga provincial bus kaya naman nagsusulputan ang mga kolorum na behikulo, ayon sa Provincial Bus Operators Association of the Philippines (PBOAP).

"Marami namang mga ruta na nabuksan na pero marami pang lugar ang wala pang biyahe katulad ng buong probinsiya ng Pangasinan, walang biyahe papuntang Manila 'yan; Abra, La Union, Cordillera very limited ang mga biyahe. 'Yung buong probinsya ng Quezon wala pa rin biyahe papuntang Manila at buong rehiyon ng Bicol walang biyahe rin 'yan,” ayon kay PBOAP executive director Alex Yague.

Sa panayam sa TeleRadyo Martes ng umaga, sinabi ni Yague na maraming mga pasahero ang nagtitiyaga sa pagsakay sa mga kolorum na behikulo lalo pa’t kung kinakailangang bumiyahe ng probinsiya.

"Ang nangyayari, pag walang bus na bumibiyahe nagkakaroon ng kolorum,” sabi ni Yague.

Sa halip na may masakyang lehitimong transportasyon, sa mga kolorum sumasakay ang mga pasahero dahil ang mga ito ang available.

"Napakamahal na, hindi pa nasusunod 'yung mga safety protocols na kailangang masunod,” sabi niya.

May mga linyang nabuksan naman na pero ang mga lokal na pamahalaan ang nagbibigay ng numero kung ilang units lamang ng mga bus ang pwedeng pumasok sa kanilang siyudad. Katulad aniya ito ng Baguio na nagtatakda ng bilang ng mga bus na pwedeng makapasok sa lungsod kada araw.

“Bawat local government iba-iba ang protocol. Kung uniform sana ang mga requirement, madaling makasunod,” sabi niya.