700 pamilya nasunugan sa Parola Compound

ABS-CBN News

Posted at Feb 23 2019 12:13 AM | Updated as of Feb 23 2019 11:06 AM

Mga residente sinaktan umano ang mga bombero at inagaw ang mga hose

MANILA (UPDATE) - Nawalan ng tahanan ang nasa 700 pamilya matapos masunog ang isang residential area sa Parola Compound sa Tondo, Maynila, Biyernes ng gabi. 

Mabilis na kumalat ang apoy sa 350 bahay ng illegal settlers dahil magkakadikit ang mga ito at gawa sa light materials. 

Walang naisalbang gamit ang karamihan sa mga residente. 

Kabilang sa kanila ang estudyanteng si Manalou Pinoliad na tanging 2 libro lamang ang nailigtas mula sa sunog. 

"Lahat ng gamit ng nanay ko ubos," aniya. 

"Tulog kami. Nagising na lang kami marami tao sa labas nagsigawan," dagdag ng residenteng si Gloria Barri. 

Naantala ang pag-apula sa sunog dahil inagaw umano ng ilang residente ang hose at sinaktan pa ang ilang bombero. 

"'Pag ganitong sitwasyon, natatakot na silang (bombero) magtatrabaho, ayaw nang pumasok," kuwento ni Fire Insp. Jose Troy Juaneza, hepe ng Tondo fire station. 

"May isang binugbog dahil ayaw ibigay ang hose, may tinutukan ng baril kaya nagradyo kami na magkaroon ng police visibility dito sa area," dagdag niya. 

Maaaring electrical overload o napabayaang pagluluto ang sanhi ng sunog na naapula pasado alas-6 ng umaga Sabado, ayon sa BFP. 

Pansamantalang nakisilong sa Delpan evacuation center ang karamihan sa mga nasunugan. 

Sumiklab ang sunog sa parehong gabi na natupok ang opisina ng Bureau of Customs sa kalapit na South Harbor, dahilan para masira ang ilang dokumento at computer files ng ahensya. 

May ulat nina Michael Delizo at Jekki Pascual, ABS-CBN News 

Bisitahin ang Patrol.PH para sa iba pang mga balita.