Ilang pulis, nabiktima ng investment scam

ABS-CBN News

Posted at Feb 23 2018 09:00 PM | Updated as of Nov 07 2019 05:05 PM

Watch more in iWant or TFC.tv

Kabilang ang ilang pulis sa mga naging biktima ng isang investment scam.
    
Dahil sa pangakong 28 hanggang 35 percent interest kada buwan, naengganyo si Police Officer 2 (PO2) "Juan" na mag-invest noong Nobyembre sa Wahana Credit and Loan Corporation na nagpapautang sa mga casino.

Nasa P1 milyong piso ang pinagtulungang buuin at ipinuhunan nila ng mga kasamang pulis, habang P200,000 dito ay nagmula sa kanya.
    
Mabilis daw ang return of investment, pero lumalabas na sa una lang tumupad sa pangako ang Wahana.

"Sa ngayon po, hindi na po kami umaasa, malabo na po," ani PO2 Juan.

Si PO1 "Karen" naman, nag-invest ng P100,000.    
 
"Maging aral na din sa atin na kailangan mabusisi tayo," sinabi ni PO1 Karen.

Noong isang linggo, naaresto sa Las Piñas City ang 11 tauhan ng Wahana.

Pinaghahanap naman ang mga lider ng kumpanya, kabilang sina Salvie Anahaw at Ma. Lysa Soler na nahaharap sa kasong syndicated estafa.    

Pinuntahan ng News team ang ilan sa mga property nina Anahaw, pero nakakandado ito at wala nang tao.

Isinailalim naman sa restrictive custody ng National Capital Region Police Office (NCRPO) si PO3 Rafael Muchuelas matapos umanong biktimahin ang ilang pulis sa parehong scam.
    
Sinasabing humigit kumulang P30 milyon ang kanyang natangay.
    
Ginagamit pa umano ni Muchuelas ang pangalan ni NCRPO chief Oscar Albayalde para makaengganyo ng investors.

"Pati ako, kung minsan, nababanggit pa na investor din ako... wala akong investment diyan," ani Albayalde. 
    
Payo ng Philippine National Police sa mga tauhan, maging mapanuri bago mamuhunan sa anumang negosyo.
    
--Ulat ni Bianca Dava, ABS-CBN News

Bisitahin ang Patrol.PH para sa iba pang mga balita.