Pinakamalamig na temperatura sa Metro Manila mula Nobyembre naitala: PAGASA

ABS-CBN News

Posted at Feb 21 2021 05:26 PM | Updated as of Feb 21 2021 05:55 PM

Jonathan Cellona, ABS-CBN News

MAYNILA – Naitala nitong madaling araw ng Linggo ang pinakamalamig na temperatura sa Metro Manila mula noong Nobyembre, ayon sa state weather bureau na PAGASA. 

Sa tala ng PAGASA, umabot sa 19.3 degrees Celsius ang temperatura sa Metro Manila bandang alas-5 ng umaga, na epekto umano ng hanging amihan.

“Ito ‘yong hangin na galing dito sa mainland Asia o sa mainland China na during this time na spring na kasi. Ibig sabihin, natutunaw na ‘yong ibang yelo so malamig ‘yong hangin na galing sa Tsina na dumidiretso dito sa atin,” paliwanag ni PAGASA weather forecaster Raymond Ordinario.

Narito naman ang temperaturang naitala sa iba pang panig ng Luzon:

  • Baguio City – 9 degrees Celsius
  • Tanay, Rizal – 16.5 degrees Celsius
  • Tuguegarao City – 17.7 degrees Celsius
  • Laoag, Ilocos Norte – 16.8 degrees Celsius
  • Basco, Batanes – 17 degrees Celsius
  • Benguet – 7.9 degrees Celsius

Kalimitang nagtatagal ang amihan season hanggang katapusan ng Pebrero ngunit dahil bumubugso pa rin ito, maaari umanong tumagal pa ang malamig na panahon hanggang ikalawang linggo ng Marso.

Watch more in iWantTFC

Maaari rin umanong maantala ang pagpasok ng tag-init.

“Posible siyang ma-delay dahil nga if we are in the La Niña season,” ani Ordinario.

Kaya nagpaalala muli ang mga doktor sa mga sakit na puwedeng makuha tuwing taglamig.

“Kunyari, common cold, influenza. Mas nararamdaman natin sila tuwing malamig dahil humihina ang resistensya natin,” ani Dr. Noel Bernardo mula sa Philippine Red Cross.

Payo ng mga eksperto para maiwasang magkasakit ngayong taglamig:

  • Magsuot ng makapal na damit
  • Iwasang magtagal sa labas o magpagabi
  • Kumain nang tama at uminom ng maraming tubig
  • Bawasan ang pag-inom ng kape at alak

– Ulat ni Jeffrey Hernaez, ABS-CBN News

Bisitahin ang Patrol.PH para sa iba pang mga balita.