30 motorista, PUV nahuling lumabag sa health protocols sa Las Piñas

ABS-CBN News

Posted at Feb 19 2021 10:30 AM

MAYNILA - Mahigit 30 na ticket ang inisyu ng mga tauhan ng Inter-Agency Council for Traffic special forces team sa kanilang operasyon sa Alabang-Zapote Road sa Las Piñas City, Biyernes ng umaga.

Karamihan sa mga sinita ay mga driver at konduktor ng mga public utility vehicles (PUVs) na nakitang walang suot na face mask o face shield ang mga pasahero.

Nagbabaan din ang ilang pasahero ng jeep at bus nang sitahin ang sasakyan ng mga i-ACT enforcer. 

Katuwiran ng iba, nakalimutan nila sa bahay ang kanilang mga face shield. Ang isang ginang, hindi talaga nagdala nito dahil madaling-araw namalengke.

Umapela naman ang isa sa mga driver dahil sa laki ng P2,000 na multa sa paglabag sa health protocols, pero hindi siya napagbigyan.

Hiling nila na sana babala o mas magaang na multa na lang ang ibigay sa kanila o kaya pasahero na mismo ang pagmultahin.

Sagot ni i-ACT team leader Ret. Col. Deck Decena, trabaho lang at pagsunod ito sa nakatakdang batas.

Nagpaalala rin siya sa mga pasahero na huwag kaligtaan ang pagsuot ng face mask o face shield para hindi maperwisyo pati ang mga driver.

Bukod sa mga nakasakay na walang suot na takip sa mukha, sinita rin ang mga PUV na wala nang harang sa pagitan ng mga pasahero.

Nag-isyu din ng ticket sa mga motorcycle rider na hindi maayos ang suot na helmet at mga pribadong sasakyan na hindi nakasuot ng seatbelt ang pasahero.

Nag-impound din ng 2 motorsiklo dahil walang lisensya o student license lang ang ipinakita ng rider.

Araw- araw na may operasyon ang i-ACT sa mga kalsada kaya panawagan nila sa publiko, sana matandaan ang health protocols lalo na ang pagsuot ng face shield para hindi maabala ang kanilang biyahe. 

RELATED VIDEO:

Watch more on iWantTFC