Belo pharmacy sa Alabang, ipinasara ng FDA

ABS-CBN News

Posted at Feb 19 2018 06:05 PM | Updated as of Sep 03 2019 12:46 PM

Watch more in iWant or TFC.tv

(UPDATED/ CORRECTED) Ipinasara nitong Lunes ng Food and Drug Administration (FDA) ang botika sa loob ng klinika ng Belo Medical Group (BMG) sa West Gate, Alabang, Muntinlupa dahil umano sa pagtanggi nitong magpa-inspeksiyon at pagbebenta rin ng 11 cosmetic at drug product na hindi rehistrado umano sa FDA.

Pero sa isang pahayag, sinabi ng BMG na pumayag ang kanilang botika na ma-inspeksiyon, at di rin umano nakita ang mga produktong nabanggit ng FDA sa kanilang klinika.

Ayon kay FDA Regulatory Enforcement Unit chief Allen Bantolo, una na silang nagpadala ng utos noong Pebrero 9 sa BMG para itigil ang pagbebenta ng 11 produktong nabili mismo ng mga operatiba ng FDA sa kanilang surveillance sa establisimyento.

Pero hindi umano tumalima sa utos ang BMG. 

"Based sa report namin, they were cited for indirect contempt dahil sa pag-refuse nila to execute the inventory and seizures of 11 unregistered products," ani Bantolo.

Saad ng utos na nagpapasara sa establisimyento: "Padlock the subject pharmacy premises where the aforementioned violative products are stored, pursuant to Sec 3 (b) (2) Article VII, Book III of the IRR [implementing rules and regulations] of RA 9711, until further notice from the FDA." 

Ang Republic Act 9711 ay ang Food and Drug Administration Act of 2009. 

Kombinasyon ng klinika at botika ang establisimyento ng BMG sa Muntinlupa.

Mabibili sa botika ang mga inireresetang gamot ng mga doktor sa klinika.

"For the public to know lalo na kung nagbebenta kayo ng drugs, medicines. Dapat ang pharmacist nandiyan. Para makasiguro ang public na nasu-supervise ang pagbebenta at saka yung prescription na pini-prescribe ng doctor ay tama doon sa binibili ng ating pasyente o client," ani Bantolo.

Ayon sa FDA, ito ang 11 produkto ng BMG na di rehistrado sa ahensiya:
- ZO Medical by Zein Obagi
- MD Glycogent Exfoliation Accelerator 10% concentration
- ZO Medical by Zein Obagi Foamacleanse Gentle Foaming Cleanser for all types
- ZO Medical by Zein Obagi Oclipse Sunscreen/Primer SPF 30 Protection
- Belo Illuminating Cream Alpha Arbutin+Liquorice
- Belo Prescriptives Keralyt 2 Cream
- ZO Medical by Zein ObagiMD Melamix Skin Lightener & Blending Creme Hydroquinone USP 4%
- ZO Medical by Zein Obagi MD Melanin Skin Bleaching & Correcting Creme Hydroquinone USP 4%
- Belo Prescriptives Acne Astringent
- Belo Prescriptives Belo White
- Belo Prescriptives DLC Peeling Creme
- ZO Medical by Zein Obagi MD Cebatrol

Sa isang pahayag naman, sinabi ng BMG na pumayag ang kanilang botika na ma-inspeksiyon.

Hindi rin umano nakita ang mga produktong nabanggit ng FDA sa kanilang klinika.

Kinuwestiyon din ng BMG ang pagsasama ng FDA ng media sa operasyon nito.

"FDA personnel served Summons in our Alabang Clinic, which contains an order to close the clinic's pharmacy however, our Alabang clinic fully cooperated and allowed the inspection of the pharmacy. Furthermore, the FDA upon inspection, found no presence of the products in question and therefore DID NOT PADLOCK the clinic as opposed to what was recently inaccurately reported," saad ng pahayag ng BMG.

"We reiterate that we understand and support the FDA's mandate and we have undertaken all necessary steps to comply. However, we would like to express our concern as to how these inspections have been conducted with the presence of the press. We feel that this is unnecessary and highly irregular."

Editor's note: Sa unang bersiyon ng ulat na ito, nakasaad na ipinasara ng FDA ang klinika ng Belo, na hindi wasto. Binabago natin ang titulo ng ulat na ito para linawing ang botika lamang sa loob ng klinika ang ipinasara. 

Bisitahin ang Patrol.PH para sa iba pang mga balita.