PatrolPH

Physical distancing pahirapan sa paggunita ng Ash Wednesday sa Baclaran Church

Anjo Bagaoisan , ABS-CBN News

Posted at Feb 17 2021 02:00 PM

MAYNILA - Naging mahirap ang pagpapatupad ng physical distancing sa paggunita ng Ash Wednesday sa Baclaran Church, sa gitna ng pagdami ng bilang ng pinapayagang tao sa loob ng mga simbahan.

Nawala na ang 1 metrong distansiya sa sunod-sunod na paglapit ng mga deboto para magpabudbod ng abo sa mga volunteer sa harap ng gusali ng simbahan pagkatapos ng unang misa, umaga nitong Miyerkoles.

Hindi na napakinggan ang paalala at paghawi ng ibang mga volunteer.

Pangalawang taon na ito ng contactless na Ash Wednesday sa simbahan.

Pero ayon kay Fr. Victorino Cueto, rector ng Baclaran Church, hamon nilang gawin ito sa gitna ng mga pinatutupad na health protocol.

"‘Yong mga iba din, talagang gustong mauna sa pila. Siguro gutom na, ayaw maghintay. Kaya 'yan ang isang malaking-malaking challenge talaga - magpanatili ng physical distancing - dahil pinoprotektahan natin ang bawat isa,” aniya.

Nanibago pa ang isang volunteer na sa simula ay nagpahid ng abo sa noo ng ilang mananampalataya, gaya ng nakagawian.

Bagong karanasan ito para sa ilang nagsimba gaya nina Omar Vargas at mga kaibigan niyang nagbisikleta mula Merville, Paranaque papuntang simbahan.

“‘Yong pagpunta namin, ‘di namin expected na ganoon ang gagawin. So, nanibago lang talaga. Sa tingin ko kasi, parang mas safe siya kasi hindi mo ita-touch sa ano. ‘Yon lang, na-touch mo pa rin 'yong abo. Pero normally, wala naman,” sabi niya.

Dasal niya at ng kaibigang si Jolina Quijada, sana magbalik-normal na ang lahat. 

Umabot sa capacity na 3,000 tao ang bilang ng mga nagsimba, lalo’t unang linggo ng 50-percent capacity sa mga religious places.

Hanggang gate na ang pila ng mga napatayo sa labas ng gusali dahil napuno na ang nasa 1,500 sitting at standing capacity sa loob.

Ayon kay Cueto, magiging hamon ang pagmando sa daluyan ng tao sa bagong patakaran.

Mahigit 50 volunteer ang idinagdag tuloy ng Baclaran Church para tumulong sa kaayusan, pagbibigay ng komunyon, at pagbudbod ng abo. 

Kaya aabot ng 100 ang mga nagsisilbing volunteer ngayong araw. 

"Daloy ng tao ang pinakamalaking challenge, dahil ‘'yong mga protocols -- pagsuot ng facemask, face shield, pagkuha ng temperatura, paglalagay ng temperatura, ginagawa naman natin bago pumasok ng church. ‘Yon lang kapag nasa loob na ang mga tao, mas maging conscious sa distansya amigo, amiga, 'Yon talaga ang malaking challenge," ani Cueto.

Hanggang gabi bukas ang simbahan ng Baclaran para sa mga magpapalagay ng abo.

Pero nirekomenda ng pamunuan nito na sa mga mas malalapit na parokya na lang kunin ng iba ang mga do-it-yourself o nakapakete nang abo.

Dagdag ng pari, gawing taimtim pa rin ang paglalagay ng abo kahit sa bahay na ito gagawin.

Nagpaalala rin si Cueto sa mga kapuwa Katoliko na huwag pabayaan ang mga panata ng panalangin at abstinence o pagsasakripisyo ng pagkain ngayong Lenten Season.

"Kailangang-kailangan natin ng social solidarity, pagmamalasakit, pagkalinga sa isa’t isa, lalo na sa panahon ng pandemya," aniya.

"Alam nating marami tayong kapatid na mas nangangailangan at kung mas mabibigyang-buhay natin ang ating pananampalataya na tayo ay nagiging biyaya sa iba at isa’t isa, ay mas magiging makahulugan ang ating Kuwaresma.”

RELATED VIDEO

Watch more on iWantTFC
Bisitahin ang Patrol.PH para sa iba pang mga balita.