PatrolPH

Higit 1K na baboy mula GenSan, nasa biyahe na pa-Maynila para masiguro ang suplay

ABS-CBN News

Posted at Feb 16 2021 03:18 PM

Higit 1K na baboy mula GenSan, nasa biyahe na pa-Maynila para masiguro ang suplay 1
Papuntang Metro Manila ang mga baboy na mula sa General Santos City. Dumaong ang barkong may karga sa mga ito sa Lucena City na sinalubong naman ni Agriculture Secretary William Dar at iba pang opisyal. Larawan mula sa Department of Agriculture Region 4A

LUCENA CITY - Dumaong sa Talao-Talao Port sa lungsod, Martes ng umaga, ang barkong may kargang 1,350 na mga baboy na galing General Santos City at papuntang Metro Manila, na layon na masiguro ang suplay sa merkado sa gitna ng epekto ng African swine fever. 

Sinalubong ang mga baboy na sakay ng M/V Viva Marian Queen ni mismong Agriculture Secretary William Dar, kasama ang ilang department heads, ang DA Region 4A, at sina Quezon Governor Danilo Suarez at Lucena City Mayor Dondon Alcala.

Sa isang panayam, sinabi ni Dar na ang mga mamimili ay makakasigurado na ang presyo ng mga produktong baboy ay alinsunod sa Executive Order No. 124 na nagtatakda ng price ceiling.

Tiniyak naman ng kagawaran, katuwang ang Bureau of Animal Industry, na ang pagdaan ng mga baboy sa CALABARZON region ay naisagawa nang hindi nasasakripisyo ang mga quarantine protocols na ipinatutupad. 

Ang pagbiyahe sa mga baboy mula SOCCSKSARGEN ay saklaw ng "special hog lanes" kabilang ang "roll-on, roll-off" at mga ruta ng truck.

RELATED VIDEO:

Watch more on iWantTFC

- Ulat ni Andrew Bernardo

Bisitahin ang Patrol.PH para sa iba pang mga balita.