13 babaeng binubugaw umano online, sinagip sa Pasay

Anjo Bagaoisan, ABS-CBN News

Posted at Feb 16 2021 06:58 AM

Watch more on iWantTFC

MAYNILA - Sinagip ng mga pulis at social worker ang 13 babae mula sa umano’y online prostitution ring nang i-raid ang tinuturong tirahan at operations base ng grupo sa isang condominium sa Pasay City Lunes ng gabi.

Arestado rin ang 2 sinasabing kahera at dispatcher ng “Pleasure Massage”.

(https://twitter.com/anjo_bagaoisan/status/1361428982537719810?s=20)

Nagsagawa ng rescue operation ang PNP Women and Children Police Center - Luzon Field Unit (WCPC-LFU) matapos ituro ang lugar ng biktima na unang sinagip ng nagpanggap na customer.

Ayon kay Police Lt. Col. Jun Rodrigueza, officer-in-charge ng WCPC-LFU, front ng grupo ang massage service na binu-book sa isang website at ihahatid ang biktima sa lugar ng kitaan tulad ng hotel.

Sabi ng pulis, hindi bababa sa P4,500 ang serbisyo pero walang nangyayaring masahe.

Hindi na ma-a-access ngayon ang website ng “Pleasure Massage”.

 

Nitong Enero isinumbong sa WCPC ang umano’y pambubugaw pero nahirapan silang matunton ito dahil naniniguro ang grupo sa kliyente.

Inaresto ang isang alyas “Bea” na ayon sa pulis ay nagsisilbing tagakolekta ng kinikitang pera at isang alyas “Rodel” na taga-asikaso naman ng booking ng mga biktima.

Nakita sa ni-raid na unit ang isang blackboard na naglilista ng pangalan ng mga babae at ng kanilang pagserbisyo.

Mahaharap sina “Bea” at “Rodel” sa kasong paglabag sa Anti-Trafficking in Persons Act.

Ayon kay Rodrigueza, nagpapatuloy ang pagkalap nila ng impormasyon sa iba pang tao na nagpapatakbo ng prostitution ring para sa susunod nilang operasyon. 

Isinailalim naman sa debriefing at counseling ang 13 biktima na ililipat sa pangangalaga ng mga social worker.

FROM THE ARCHIVES

Watch more on iWantTFC