PatrolPH

Gobyerno maglalabas ng guidelines para sa pagbubukas ng mga sinehan: DOH

ABS-CBN News

Posted at Feb 15 2021 06:33 PM | Updated as of Feb 15 2021 07:35 PM

Gobyerno maglalabas ng guidelines para sa pagbubukas ng mga sinehan: DOH 1
ABS-CBN News/File

(UPDATE) Nakatakdang maglabas ng guidelines ang gobyerno kaugnay sa tamang ventilation sa mga sinehan para mabawasan ang pangamba sa pagkalat ng COVID-19 sa mga naturang establisimyento.

Noong nakaraang linggo, pinayagan ng Inter-Agency Task Force on Emerging Infectious Diseases (IATF) ang muling pagbubukas ng mga sinehan, arcade, museo at theme park sa mga lugar na nasa ilalim ng general community quarantine, tulad ng Metro Manila.

Pero nanatili pa ring sarado ang ilan sa mga ito matapos umalma ang mga mayor sa Metro Manila.

Tiniyak naman ng Department of Health (DOH) na magkakaroon ng guidelines para maging maayos ang ventilation o daloy ng hangin sa mga sinehan.

"It was discussed in the IATF and one of the safeguards that was used was the guidelines upcoming, which will be coming from the Department of Labor and Employment (DOLE) wherein they consulted with an epidemiologist so that they can provide these ventilation requirements," sabi ngayong Lunes ni Health Undersecretary Maria Rosario Vergeire.

Ayon sa DOH, susundin pa rin naman ang minimum health protocols, na dadagdagan ng guidelines mula sa DOLE.

Watch more on iWantTFC

Ayon pa kay Vergeire, iinspeksiyunin din ang mga sinehan.

"We are going to assess also these establishments before it is being implemented," aniya.

Nagpasya naman ang Malacañang na ipagpaliban muna sa Marso 1 ang pagubukas ng mga sinehan dahil sa pagtutol ng Metro Manila mayors.

"Ang pagpapatupad po ng pagbubukas ng sinehan, kung matutuloy po, ay Marso 1," ani Presidential Spokesperson Harry Roque.

Naalarma kasi ang mga alkalde ng Metro Manila sa muling pagbubukas ng ilan sa mga establisimyento, partikular ng mga sinehan.

"Nandoon po kami nakikiisa sa pag-o-open ng ekonomiya. Pero we could not sacrifice ang health protocol po natin. Alam naman natin, sa cinema enclosed 'yan, tatlong oras sa air-conditioned," ani Parañaque Mayor Edwin Olivarez, na chairman din ng Metro Manila Council.

Watch more on iWantTFC

"Maaaring mas malaki ang mawala sa ekonomiya kung mauulit ang pagkalat ng virus," sabi naman ni Marikina Mayor Marcelino Teodoro.

Ayon sa Metro Manila Council, wala namang kuwestiyong dapat umarangkada muli ang mga negosyo pero dapat ay mas marami ang konsultasyon ukol sa mga patakaran kaugnay nito.

Magpupulong ngayong gabi ng Lunes ang Metro Manila Council para ilatag ang kanilang requirements, na ipapasa sa IATF para maisama sa ibababang guidelines sa pagbubukas ng mga sinehan at iba pang entertainment hubs. 

Tutol din sa pagbubukas ng mga sinehan ang OCTA Research Group, na binubuop ng mga propesor na nagsasagawa ng mga pag-aaral sa mga datos ng COVID-19.

"It would take at least an hour to view a movie and in such a period, based on the studies they are familiar with, talagang puwede talaga magkaroon ng transmission diyan, lalo na pag hindi nasunod 'yong minimum health standards and practices," ani Ranjit Rye ng OCTA Research Group. 

Ayon sa grupo, mas mainam kung open air o may filtration system.

Watch more on iWantTFC

Pero dahil sa pagtaas ng mga kaso ng COVID-19 sa labas ng Metro Manila, hindi pa muna umano dapat ipatupad ang pagluwag sa mga restriction. 

Sinabi rin ng OCTA na mas magandang mailunsad muna ang vaccination program, lalo na sa mga health worker, at makita ang totoong sitwasyon sa mas nakahahawang COVID-19 variant mula United Kingdom.

"'Wag nating bigyan ng pagkakataon itong mga bagong variant na ito, na mas contagious, to take hold," ani Rye. 

Samantala, bukod sa mga sinehan, pinayagan na ring magbukas ang mga driving school, kaya dumami na ulit ang nag-i-inquire para mag-enroll.

Hindi pa rin nagbubukas ang ilang arcade.

Ayon kay Roserg Yang, operation shift manager ng Tom's World arcade, kailangan pa nilang mag-renew ng permit at lagyan ng acrylic dividers ang mga machine.

-- Ulat nina Kristine Sabillo, Doris Bigornia, at Zen Hernandez, ABS-CBN News

Bisitahin ang Patrol.PH para sa iba pang mga balita.