Lalaki, patay sa pamamaril sa QC

Dennis Datu, ABS-CBN News

Posted at Feb 08 2018 04:51 AM

Patay ang isang lalaki matapos pagbabarilin sa Barangay Tatalon, Quezon City Huwebes ng hatinggabi.

Kinilala ang biktima na si Gerardo Billones.

Base sa inisyal na imbestigasyon, nakatayo lamang ang biktima sa tapat ng binabantayang tindahan nang harapang pagbabarilin.

Nakunan sa isang CCTV camera ang 2 suspek na tumatakas patungong Quezon Ave.

Naitakbo pa si Billones sa ospital pero binawian din ng buhay.

May hinala naman ang kapatid ng biktima kung sino ang maaaring may gawa ng krimen.

Noong Sabado, may pinagalitan at pinaalis umano si Billones na mga nag-aaway sa tapat ng kanilang bahay habang sila ay may okasyon.

"Hindi naman makatao ginawa niya. Kung sakaling nagkaroon ng problema siya sa kapatid ko, sana di naman niya ginanun grabe. Galit na galit siya. Tatlong putok. Talagang sinigurado niyang 'di na mabubuhay," aniya.

Ayon naman sa mga nakakakilala sa biktima, relihiyoso umano ito.

"Sa pagkakilala namin, mabuting tao naman ito...active siya sa Nazareno," ani Edwin Abaño, isang barangay kagawad.

Bisitahin ang Patrol.PH para sa iba pang mga balita.