PatrolPH

Pagbabakuna kontra COVID-19 sa edad 5-11 umarangkada sa Metro Manila

ABS-CBN News

Posted at Feb 07 2022 12:54 PM | Updated as of Feb 07 2022 09:41 PM

Sinimulan na nitong Lunes, ika-7 ng Pebrero 2022, ang pagbabakuna kontra COVID-19 sa mga batang may edad 5 hanggang 11. Isa ang National Children's Hospital sa Quezon City sa mga vaccination sites para sa naturang age group. Wena Cos, ABS-CBN News
Sinimulan na nitong Lunes, ika-7 ng Pebrero 2022, ang pagbabakuna kontra COVID-19 sa mga batang may edad 5 hanggang 11. Isa ang National Children's Hospital sa Quezon City sa mga vaccination sites para sa naturang age group. Wena Cos, ABS-CBN News 

MAYNILA (UPDATE) — Umarangkada ngayong Lunes ang pagbabakuna kontra COVID-19 sa mga batang may edad 5 hanggang 11.

Sa 33 vaccination site sa Metro Manila nagsimula ang pagbabakuna sa naturang age group, na palalawigin sa ibang lugar sa susunod na linggo.

Sa National Children's Hospital sa Quezon City, pinangunahan ni vaccine czar Carlito Galvez ang symbolic vaccination.

Isa sa mga unang binakunahan sa ospital si Chloe Cabanting, ang pamangkin ni Galvez. Naniniwala si Cabanting na malaking bagay para sa kaniya ang pagkakaroon ng proteksiyon laban sa COVID-19.

"I want to have face-to-face classes again, because there are a lot of limits if we only have our gadgets... Now that we're vaccinated, there's more to see than just our gadgets," ani Cabanting.

Sa pagbabakuna ng mga bata, magkakaroon muna ng counseling kung saan ipapaliwanag sa bata ang bakuna, mga benepisyo nito at mga posibleng side effect. 

Matapos ang counseling ay kukuhanin ang vital signs ng bata at ia-assess ng medical professional kung dapat bang tumanggap ng bakuna.

Kapag may go-signal na ay saka dederetso ang bata sa mismong bakunahan.

Watch more News on iWantTFC

Iba-ibang gimik naman ang ginawa sa mga vaccination site para mahikayat ang mga bata.

Sa Quezon City, may pelikulang pinapalabas sa waiting area para hindi mabagot ang mga batang naghihintay. Mayroon ding libreng pagkain.

Sa Maynila, naka-costume pa ang mga health worker. Namimigay rin ng mga libreng ice cream, kendi at mga biskuwit.

Ginawa rin vaccination site ang Manila Zoo para magkaroon ng open air at mas ligtas sa mga bata.

Present naman sa San Juan City ang mga idolong superhero ng mga bata.

Birthday party naman ang tema ng bakunahan sa Makati City.

Ayon sa guidelines ng Department of Health, bukod sa informed consent ng magulang, kailangan ang pag-oo ng batang edad 7 hanggang 11 sa pamamagitan ng verbal o signed consent bago magbakuna.

Para naman sa mga batang 5 hanggang 6, basta hindi ito hayagang humihindi sa pagbabakuna, maaari itong tumanggap ng COVID-19 vaccine.

Ayon kay Health Secretary Francisco Duque III, nasa 1.7 milyon batang edad 5 hanggang 11 ang target mabakunahan kontra COVID-19.

Sa huling tala, 59.8 milyong Pilipino na ang nababakunahan habang 8 milyon naman ang nakakuha ng booster shot.

— Ulat nina Wena Cos, Zyann Ambrosio, Raya Capulong, Katrina Domingo, Bianca Dava, Jeck Batallones

Watch more News on iWantTFC
Bisitahin ang Patrol.PH para sa iba pang mga balita.