Tigdas outbreak idineklara sa NCR, Central Luzon

ABS-CBN News

Posted at Feb 06 2019 04:58 PM | Updated as of Feb 06 2019 08:29 PM

Watch more in iWant or TFC.tv

(UPDATED) Kinumpirma ng mga opisyal ng Department of Health (DOH) ngayong Miyerkoles na may measles outbreak o pagkalat ng sakit na tigdas sa National Capital Region at Central Luzon.

"Yes, there is an outbreak of measles (in NCR)," sabi ni Health Secretary Francisco Duque.

Lumobo ng 550 porsiyento ang mga kaso ng tigdas mula Enero 1 hanggang Pebrero 6 ng 2019 kompara sa parehong panahon noong nakaraang taon, ayon kay Duque.

Nagtala ang DOH ng 169 kaso ng tigdas sa NCR mula Enero 1 hanggang Pebrero 6 ngayong taon, malayo sa 26 kaso na naitala noong parehong panahon noong 2018.

Mula rin noong Enero, hindi bababa sa 55 pagkamatay dahil sa tigdas ang naitala sa San Lazaro Hospital sa Maynila. Karamihan sa mga namatay ay mga batang nasa tatlong buwan hanggang apat na taon ang edad.

Hindi rin bababa sa 248 bata ang nagpapagamot sa San Lazaro Hospital dahil sa naturang sakit, base sa tala noong umaga ng Martes.

Kinumpirma naman ang outbreak sa Central Luzon ni Jesse Fantone, pinuno ng Regional Epidemiology and Surveillance Unit ng DOH.

"Yes, it’s an outbreak," sabi niya.

Sa huling tala ng DOH noong Pebrero 2, may 442 nang kaso ng hinihinalang tigdas sa Central Luzon.

Nauna nang hinimok ni Health Undersecretary Eric Domingo na pabakunahan ang kanilang mga anak laban sa nakahahawang sakit na tigdas.

Maaaring mauwi ang tigdas sa mga komplikasyong gaya ng pagtatae, pulmonya, pagkabulag at pagkamatay.

--Ulat nina Raphael Bosano at Trisha Mostoles, ABS-CBN News

Bisitahin ang Patrol.PH para sa iba pang mga balita.