Nakuhanan ng CCTV footage ang umano'y panghoholdap ng isang lalaki sa bakery sa Quezon City. ABS-CBN News
Napatay ngayong Linggo ang isang lalaking sinasabing nangholdap ng bakery sa Quezon City matapos umanong manlaban sa mga pulis na aaresto sana sa kaniya.
Nakuhanan pa ng CCTV footage ang lalaki na pumasok sa bakery sa Barangay Culiat at tinutukan ng kutsilyo ang kahera ng establisimyento.
Tinangay umano ng suspek ang nasa P6,000 sa kaha ng bakery saka tumakas.
Natunton umano ng mga pulis ang suspek pasado alas-5 ng madaling araw sa parehong barangay.
Habang kinukuhanan ng detalye ang suspek, bigla itong nang-agaw ng baril saka nanlaban sa mga awtoridad, ayon sa pulisya.
Agad gumanti ng putok ng baril ang mga pulis laban sa suspek, na ikinamatay nito.
Isinugod pa sa ospital ang suspek, na idineklarang dead on arrival.
Ayon kay Quezon City Police District Director Brig. Gen. Nicolas Torre, iimbestigahan pa rin ng mga awtoridad ang insidente dahil standard procedure ito kapag may pulis na dawit sa pamamaril.
Kasunod ng insidente, lumantad pa sa Culiat Police Station ang iba pang biktima ng suspek, na dawit umano sa ibang insidente ng pagnanakaw sa lugar.
FROM THE ARCHIVES
Bisitahin ang
Patrol.PH para sa iba pang mga balita.