PatrolPH

Imbestigasyon sa ammonia leak sa Navotas gumugulong na

ABS-CBN News

Posted at Feb 04 2021 08:47 PM | Updated as of Feb 04 2021 11:46 PM

Watch more on iWantTFC

MAYNILA (UPDATE) – Nagsimula na ang imbestigasyon ng Bureau of Fire Protection (BFP) sa nangyaring chemical leak sa isang ice plant sa Navotas City kung saan sumingaw ang nakalalasong ammonia. 

Nagkasira-sira ang mga yerong nakaharang sa bangketa ng ginagawang kalsada sa Road 10 ng Navotas City matapos puwersahang tanggalin ng mga residente noong Huwebes. 

Nilagay ng isang pribadong kompanya ang mga harang para sa isang construction project pero sinisisi ito ng ilang residente kaya nahirapan silang makalabas matapos sumingaw ang nakalalasong kemikal mula sa T.P. Marcelo Ice Plant and Cold Storage.

<link>
https://news.abs-cbn.com/news/02/04/21/navotas-ice-plant-must-shoulder-victims-burial-hospitalization-mayor

Kuwento ng mga residente, muntik nang magka-stampede habang sinusubukang lumikas ng mga tao.

Kaya naman hindi pumayag ang mga residente nang tangkaing ibalik ang mga barikada, na ayon naman sa kompanya ay para maiwasang may tumawid sa highway na malimit dinaraanan ng malalaking trak. 

Nanatiling sarado ang planta ng T.P. Marcelo habang nagpapatuloy ang imbestigasyon sa nangyaring insidente.

Ayon sa BFP, mataas pa rin ang lebel ng ammonia sa loob ng planta kaya di pa nila ito tuluyang mapasok hanggang sa ngayon. 

Bukod pa rito ang kakulangan nila sa gamit para masukat kung gaano pa karami ang naiwang kemikal sa hangin. 

Nangangalap pa ng ebidensiya at testigo ang BFP sa insidente at dalawang anggulo ang tinitingnan nilang maaaring sanhi ng pagtagas ng ammonia: ang pressure sa equipment at ang kalumaan ng tangke. 

Ayon sa lokal na pamahalaan, nakauwi na ang karamihan sa mga naapektuhan ng chemical leak pero 26 pa ang nasa ospital.

Dalawa naman ang kumpirmadong namatay.

Bukod sa multa at kasong administratibo, maaaari ring maharap sa kasong kriminal ang pamunuan ng planta, depende sa kalalabasan ng imbestigasyon ng mga awtoridad. 

Samantala, patuloy pa ring inoobserbahan sa Tondo General Hospital ang dalawang pasyenteng na-confine doon.

Mula sa 24 na pasyenteng dinala sa nasabing ospital, dalawa na lamang ang naiwan.

Isa sa mga pasyente ay ang 62 anyos na lalaking na-stroke, at ang 31 anyos na lalaking empleyado ng T.P. Marcelo.

Ayon sa attending physician na si Dr. Agnes Cayco, ang lalaking na-stroke ay nagbibisikleta lang at napadaan sa planta at nakalanghap ng ammonia. Bumagsak umano siya kalye at namanhid ang kalahati ng kaniyang katawan. 

Isang tricycle driver ang nagmagandaang loob na ihatid siya sa kanilang bahay at ang pamilya na niya ang nagdala sa kanya sa ospital. 

Sa ngayon ay ang pagkaka-stroke nya ang ginagamot dahil konti na lang umano ang sintomas ng pagkakakalanghap ng ammonia.

Ang empleyado naman ng ice plant ay patuloy na sinusuri ang kalagayan ng mata at lalamunan dahil sa dami umano ng nalanghap na ammonia. 

Malapit lang umano ito sa tangke ng ammonia nang sumabog ito kaya direktang naapektuhan ito. Namamaga rin umano ang lalamunan ng empleyado, at may mga galos din sa braso dahil sa pagkakabunggo sa mga istraktura habang palabas ng gusali, halos wala na umano kasi ito makita dahil sa kapal ng usok ng ammonia. 

Mananatili pa sila sa ospital sa loob ng ilang araw hangga't hindi pa sila umiigi. Tumanggi namang magpa-interview sa media ang mga kaanak ng dalawang pasyente.

Patuloy naman ang pagbabantay ng BFP sa ice plant at ayon kay Supt. Crossib Cante ng BFP Navotas, oras-oras sinusukat ang oxygen level sa paligid. 

Nasa normal range na umano ang oxygen na 20.5, pero sa loob ng gusali kung nasaan naroon ang nasirang tangke ng ammonia ay may amoy pa rin pero hindi na masyadong malakas.

Minsan ay may naamoy pa na konti sa compound o sa labas dahil umano sa residue na dumikit sa ilang bahagi ng gusali. 

Tiniyak ni Cante na wala nang tagas ang tangke at naamoy lang umano ito sa labas kapag mahangin.

Bumuo ang BFP NCR ng special task force na mag-iimbestiga sa pagsabog ng ammonia tank ng planta at ngayong Biyernes ay sisimulan na ang post blast investigation. 

Ilang araw din umanong tatagal ang imbestigasyon depende sa kooperasyon ng pamunuan ng planta dahil may mga dokumento umano silang dapat isumite sa task force gaya ng business permit, plan ng system ng ammonia refrigerant at mga panel system. 

Kaya mananatili itong sarado hangga't hindi natatapos ang imbestigasyon. 

Wala naman nagkasakit sa hanay ng mga bumbero dahil sa nalanghap na ammonia kahapon.


–Ulat nina Raffy Santos at Wheng Hidalgo, ABS-CBN News

Bisitahin ang Patrol.PH para sa iba pang mga balita.