TINGNAN: Police sketch ng suspek sa QC barangay chair slay

Inilabas ng Quezon City Police District (QCPD) Huwebes ang sketch ng lalaking posibleng responsable sa pagpaslang sa isang barangay chair sa lungsod.

Ayon kay QCPD director Chief Supt. Joselito Esquivel, nagtanggal ng suot na helmet ang suspek kaya nakita ng testigo ang mukha nito.

Na-enhance din ang kuha ng closed-circuit television (CCTV) sa insidente kaya nakilala ang suspek, ani Esquivel.

Nasawi noong umaga ng Miyerkoles si Criselle Beltran, chairperson ng Barangay Bagong Silangan, at driver niyang si Mario Salita matapos silang pagbabarilin ng mga nakamotorsiklong salarin.

• Barangay chairman patay sa pamamaril sa QC

Bukod sa pagiging opisyal ng barangay, kakandidato rin sana si Beltran sa pagkakongresista sa ikalawang distrito ng lungsod. Dahil doon, itinuturing ding "election-related violence" ang nangyari.

• Pinatay na barangay chair sa QC, kakandidato sanang kongresista

Kabilang sa mga sinisilip na motibo sa pamamaslang ang politika, love triangle at negosyo.

Sa ngayon, anim ang itinuturing na persons of interest ng pulisya.

Pabuya para sa makapagtuturo sa mga suspek sa pagpatay kay Bgy. Chair Beng Beltran, itinaas na sa P5-milyon ng QC government. pic.twitter.com/8OE87hrZzV

— Johnson L. Manabat (@JohnsonManabat) January 31, 2019

Nag-alok naman ng P5 milyon ang pamahalaang lokal ng Quezon City para sa makapagtuturo sa responsable sa krimen.

Kinondena rin ng Palasyo nitong Huwebes ang insidente.

-- Ulat nina Doland Castro at Johnson Manabat, ABS-CBN News