13 patay, kabilang 1 pulis, ex-kapitan, sa engkuwentro sa Sultan Kudarat

ABS-CBN News

Posted at Jan 23 2021 09:39 AM | Updated as of Jan 23 2021 09:13 PM

Watch more in iWantTFC

(3RD UPDATE) Aabot sa 13 ang namatay sa engkuwentro ng pulisya at isang grupo sa bayan ng Sultan Kudarat, Maguindanao, Sabado ng madaling araw, nang magkaputukan sa tangkang pag-aresto sa isang dating barangay chairman na may mga kinakaharap na kasong kriminal.

Patay ang dating chairman na si Datu Pendatun Kato Talusan at 11 na kasamahan nito.

Isang pulis naman ang napatay sa insidente habang dalawang pulis pa ang nasugatan, ayon sa Maguindanao police.

Hahainan sana ng arrest warrant ng mga awtoridad si Talusan nang mangyari ang engkuwentro pasado alas-3 ng madaling araw. Dati nang nakaligtas sa isang ambush si Talusan noong Abril 2020.

Bago magkabarilan, nag-live video pa sa social media si Talusan at nagsasabing may mga armadong lalaking nagmamanman malapit sa kaniyang bahay, pero hindi umano ito pulis.

"Ako malinis akong tao. Hindi ako nagdadamay ng mga sibilyan nandiyan sila sa area ng mga Kristiyano. Sabi po nila, mga intelligence sila ng Marines. Dapat bigyan niyo 'to ng pansin, Kasi kung may problema dito sa area namin, magkaproblema din,” ani Talusan sa video.

Pero ayon sa PNP, papalapit pa lang sila nang agad silang paputukan ng grupo ni Talusan.

"Prepared po 'yung mga tropa natin kung anuman ang mangyayari kaya nga po kanina na nangyaring incident, nai-close po agad natin ang area, na-secure po agad ang perimeters kaya po wala po tayong civilian na tinamaan," ani Police Lt. Eirene Libusada, public informations officer ng Bangsamoro Autonomous Region of Muslim Mindanao (BARMM) police regional office.

Ang mga nasugatang pulis ay isinugod sa Cotabato Sanitarium hospital para mapagamot.

Hindi naman nabanggit sa ulat ng Maguindanao police kung isinugod din sa ospital ang mga nasa panig ni Talusan.

Apat na kaso ang kinakaharap ng dating barangay chairman: carnapping, robbery with homicide, double frustrated murder, at illegal possession of firearms.

Ilang matataas na kalibre ng armas ang narekober ng mga pulis.

Pansamantalang ipinasara ang bahagi ng Cotabato-Davao Road dahil sa insidente. -- Ulat ni Chrislen Bulosan

Bisitahin ang Patrol.PH para sa iba pang mga balita.