PatrolPH

Hinihinalang gun-for-hire, nakuhanan ng mga baril sa checkpoint sa Antipolo

Anjo Bagaoisan, ABS-CBN News

Posted at Jan 22 2021 06:00 AM | Updated as of Jan 22 2021 06:53 AM

MAYNILA - Arestado ang isang nagpakilalang dating sundalo sa isang checkpoint sa Marcos Highway, Barangay Dela Paz sa Antipolo City Huwebes ng madaling-araw matapos masabat sa kaniya ang ilang matataas na kalibre ng baril, mga bala, patalim at pekeng plaka.

Pasado ala-1 ng madaling araw, pinatigil ng mga pulis ang puting kotse na minamaneho ng 37 anyos na si Achilles Francisco Gerona.

Ayon kay Police Lt. Col. Jose Joey Arandia, hepe ng Antipolo City police, nakita nila sa sasakyan ang isang kalibre .45 na baril.

Sa inspeksiyon, nadiskubre ng mga pulis sa trunk ng sasakyan ang mga bag na naglalaman ng sniper rifle, M16 rifle at halos 20 magasin ng rifle na may mahigit 500 bala.

May nakita ring 2 bolo at isang ice pick.

May ipinakitang lisensiya at permit si Gerona para magbitbit ng caliber .45 pero depensa niya, hindi kaniya ang mga nakuhang rifle.

Kasamang inaresto ang mga pasahero ng sasakyan—isang 37 anyos na babae na nagpakilalang kinakasama ni Gerona at ang 20 anyos na anak niya.

Sabi ni Arandia, may nakuha silang impormasyon na may papasok sa Antipolo na hitman kaya sila nagpatayo ng checkpoint sa lugar.

Ilang buwan na rin umanong lumalabas-pasok ang nasabing grupo ng mga gun-for-hire at nagbebenta ng droga.

Dagdag ng pulis, posibleng gagamitin o ginagamit sa krimen ang sasakyan dahil sa mga narekober na license plate. Hindi lehitimo ang plakang nakakabit sa kotse.

Kinukumpirma ng pulis ang kuwento ni Gerona na dati siyang sundalo pati kung kasama siya sa grupo.

Nahaharap ang 3 sa mga kasong illegal possession of firearms and ammunition at illegal use of number plates.

Isasailalim din sa ballistics test ang mga baril para malaman kung nagamit ito sa ibang krimen.

Paalala naman ng pulis sa mga lehitimong gun owner, dapat nananatiling concealed o nakatago ang baril kapag bumibiyahe.

Watch more on iWantTFC
Bisitahin ang Patrol.PH para sa iba pang mga balita.