Higit 50 motorcycle rider na nakasuot ng ‘nut shell’ helmet, tiniketan sa Taguig

Anjo Bagaoisan, ABS-CBN News

Posted at Jan 21 2021 05:13 AM | Updated as of Jan 21 2021 11:59 AM

MAYNILA - Nagpaalala ang mga Inter-Agency Council on Traffic (i-ACT) sa mga nagmomotorsiklo na isuot ang tamang uri ng helmet sa pagbiyahe.

Tiniketan ng kanilang mga tauhan ang 54 na motorcycle rider dahil hindi nakasuot ng standard na helmet nang magsagawa ang i-ACT Special Operations Team ng operasyon sa Cayetano Boulevard sa Barangay Ususan, Taguig Miyerkoles ng umaga.

Karamihan sa mga suot nila ay ang "nut shell" helmet na karaniwang suot ng mga nagbibisikleta at nagsi-skateboard. 

Dagdag pa ng i-ACT, marami sa mga nahuli ay mga empleyado pa ng lungsod.

Tinatawag itong "nut shell" dahil kalimitan tinatakpan lang nito ang itaas na bahagi ng ulo. May mga butas din ito at wala pang visor para sa mukha. 

Bukod sa hindi ito pasok sa panuntunan ng Department of Trade and Industry para sa tamang helmet, mapanganib din ito para sa mga nagmomotorsiklo dahil hindi protektado ang buong ulo sa mabilis ng takbo ng sasakyan.

Sa ilalim ng (RA 10054 o) Motorcyle Helmet Act of 2009, pwedeng pagmultahin nang mula P1,500 hanggang P10,000 ang mahuling hindi nakasuot ng standard helmet.

Kasama naman ang LTFRB, nag-impound din ang grupo ng 5 sasakyan kabilang ang 4 na van na umano'y colorum at isang jeep na walang QR code na hinihinga para pumasada.

Bisitahin ang Patrol.PH para sa iba pang mga balita.