PatrolPH

Booster vaccination kontra COVID-19 sa ilang botika umarangkada na

ABS-CBN News

Posted at Jan 20 2022 01:40 PM | Updated as of Jan 20 2022 06:23 PM

A health worker administers the COVID-19 vaccine booster shot during a symbolic vaccination at the Generika Drug Store, in Taguig City on January 20, 2022. Jonathan Cellona, ABS-CBN News
A health worker administers the COVID-19 vaccine booster shot during a symbolic vaccination at the Generika Drug Store, in Taguig City on January 20, 2022. Jonathan Cellona, ABS-CBN News

MAYNILA (2ND UPDATE) - Umarangkada na nitong Huwebes ang pagtuturok ng COVID-19 vaccine booster shots sa ilang piling botika. 

Libre ang pagbabakuna, at kailangan lang dalhin ang vaccination card at valid ID. Pero kailangang magparehistro muna online.

Kabilang sa nagbibigay ng COVID-19 booster shots ang ilang sangay ng kilalang mga botika sa Taguig at Pasig City. 

Dinagsa ang drug store sa Taguig City ng mga nais magpabakuna kontra COVID-19. Bukas ito para sa lahat ng mga nais magpa-booster shot basta't may confirmed appointment sa social media page ng nasabing botika. 

Kasama ang Watsons SM Supermalls sa Pasig City sa apat na botika na kalahok sa pilot implementation ng proyekto, na layong gawing madali ang pagkuha ng bakuna kontra COVID-19. 

Aabot sa 50 ang target bakunahan sa nasabing botika, na may available na Sinovac at AstraZeneca vaccines. Hindi pa sila tumatanggap ng walk-ins, at kailangang mag-preregister sa lokal na pamahalaan para mabigyan ng time slot. 

May registration din at screening pagpasok, at hinihiwalay ang mga mamimili sa vaccination area. May nakaantabay namang ambulansiya oras na may makaramdam ng adverse effects. 

Watch more News on iWantTFC

Ikinatuwa naman ng ilang nagpabakuna ang programa. 

"Mas mabilis 'yung service nila. Fewer people, less contact. Mas convenient, kasi mas malapit. We have a stall here," sabi ng isa sa mga nagpabakuna na si Camille Garces. 

Natuwa rin ang isang nagpabakuna na si Mabelle Marasigan. 

"Last time po na magpapa-booster sana ako, almost one hour po kaming pumila," Hindi na umano siya tumuloy dahil matagal at may kliyente na siya. 

Umarangkada na rin ang pagbabakuna sa Southstar Drug sa Marikina.

Ayon kay Marikina Mayor Marcy Teodoro, kayang magbakuna sa site ng 100 hanggang 200 indibidwal kada araw, at limitado ito sa mga tao na 18 anyos pataas. 

Dagdag ni Teodoro, nais nilang makapagbakuna ng mas maraming manggagawa para sa ligtas na pagbubukas ng ekonomiya.

Sabi naman ni Department of Trade and Industry Secretary Ramon Lopez, tinapik na ang private sector na tumulong sa vaccination drive para ma-accommodate ang mas maraming taong hindi pa nakakatanggap ng kanilang first at second dose, at booster shot.

Balak ng lokal na pamahalaan ng Marikina City na kausapin ang iba pang pharmacies, maging ang mga restaurant sa lungsod, para malaman kung magagawa rin nila ang template ng “Resbakuna sa mga Botika” dahil convenient daw ito para sa marami.

Pero ang ilang botika, nagsabi na hindi pa handang sumali sa pag-rollout ng booster shot. 

Sabi ni Jovelyn Blancaflor, pinuno ng Drugstores Association of the Philippines, kailangan pang sumailalim sa training ng mga miyembro nila at naghahanda na sila para masimulan ito. 

Pero ayon sa kaniya, marami sa kanilang mga botika ang nag-aalangang sumali dahil sa mga bayarin. 

"Bago kami bigyan ng karapatan na tumurok ng bakuna, kailangan muna naming mag-training at kailangan naming magbayad para po mabigyan kami ng certification," ani Blancaflor. 

Dagdag niya: "Free naman po 'yung sa Department of Health. May mga private individuals kasi na sila 'yung mag-a-assess, magbibigay ng exam. So 'yun po ang binabayaran namin, ang mga assessor or 'yung mga professor." 

Sa Biyernes naman magsisimulang mag-roll out ng COVID-19 vaccines ang dalawa pang mga clinic at isa pang botika sa Metro Manila.

Inaasahan ng National Vaccination Operations Center na maipapatupad na rin ito ng mga piling botika sa labas ng Metro Manila sa kalagitnaan ng Pebrero. 

-- May mga ulat nina Jeck Batallones at Vivienne Gulla, ABS-CBN News

Bisitahin ang Patrol.PH para sa iba pang mga balita.