‘Patient zero’ ng new COVID-19 variant sa PH may pulmonya, naka-quarantine

ABS-CBN News

Posted at Jan 14 2021 10:42 AM | Updated as of Jan 14 2021 04:39 PM

Watch more in iWantTFC

MAYNILA (2ND UPDATE) - Inilipat sa quarantine facility ang unang kumpirmadong kaso ng bagong coronavirus disease (COVID-19) variant mula United Kingdom sa Pilipinas, ayon sa health office ng Quezon City.

Ayon kay Dr. Rolly Cruz, pinuno ng QC Epidemiology and surveillance unit, nasa Hope Quarantine Facility ng siyudad ang 29 anyos na lalaking pasyente. 

Nang ipa-xray doon, nakitang may pneumonia siya at nagsimulang ubuhin nang ilipat sa quarantine facility. 

Ayon kay Cruz, hindi naman kailangang ilipat sa COVID-19 referral hospital ang pasyente. 

"At this time wala po kaming nakikitang dahilan para mailipat siya sa ibang quarantine o ospital, the better na hindi na siya malipat-lipat para ma-ensure natin na walang transmission na mangyayari," ani Cruz. 

Nagpapatuloy rin aniya ang contact tracing kahit na close contact lang ng pasyente ang kaniyang girlfriend. 

Naka-quarantine at sasalang na rin sa swab test ang mga frontliner na nag-asikaso sa pasyente. 

"So ang pasyente naka-antibiotics ngayon and other medication para ma-treat ang kaniyang pneumonia and then, mino-monitor natin siya kasi may mga doctor naman tayo at health workers sa hope facility na ito," ani Cruz. 

Gabi ng Miyerkoles nang i-ulat ng Department of Health na na-detect na ang mas nakahahawang coronavirus variant sa Pilipinas.

Galing United Arab Emirates ang lalaki, na nagpositibo sa B.1.1.7. SARS-CoV-2 variant. Negatibo naman ang kaniyang girlfriend pero sasailalim uli ito sa swab test.

Residente ng Kamuning, Quezon City ang pasyente na umalis pa-Dubai para sa negosyo noong Disyembre 27 at dumating sa Pilipinas Enero 27 sa Emirates Flight No. EK 332. 

Ayon kay DOH Undersecretary Maria Rosario Vergeire, hinikayat nila ang mga nasa nasabing flight na makipag-ugnayan sa mga awtoridad dahil may iilan umanong mga nasa flight na hindi tumatanggap ng kanilang mga tawag. 

Ayon kay Vergeire, aabot sa 92 ang na-contact sa 160 pasahero ng flight. Sa bilang, 52 lang ang nakakausap. Sa 23 namang nakaupo malapit sa pasyente, aabot lang sa 12 ang nakausap ng contact tracers.

"Some passengers are rejecting our call. Sana po ay kausapin nila kami para mabigyan namin sila ng guidelines on what they should do," ani Vergeire, na nagsabing nakikipag-ugnayan na sila sa mga awtoridad para mahanap ang address ng mga ito.

Samantala, tiniyak ni Quezon City Mayor Joy Belmonte na hindi lumabas sa komunidad ang lalaki at agad itong idiniretso sa quarantine facility. 

Sinundo umano siya at ang kaniyang girlfriend at hinatid agad sa pasilidad.

Bagama’t nagnegatibo ang girlfriend, isasailalim ulit siya sa swab test pati ang kanilang pamilya kahit hindi pa ito nakakasalamuha. 

"Nais nating i-reassure ang ating mamamayan na ito kahit residente ng QC, hindi po siya lumapag sa community 'nung siya ay na-test. Siya po ay idiniretso sa isolation facility so walang kailangang ikabahala ang mamamayan ng Barangay Kamuning," ani Belmonte. 

"Now what I'm waiting for is the manifesto of the other passengers that were on the same flight kasi gusto kong i-monitor lahat ng taga-QC that were on the same flight," dagdag niya. 

Irerekomenda umano ni Health Secretary Francisco Duque III kay Pangulong Rodrigo Duterte na isama ang UAE sa mga bansang may ipinapatupad na travel restriction. 

"Isasama na po natin sa talaan na may detected UK variant ang UAE. Wala naman kaming duda na ito ay aaprubahan ng Office of the President. Ngayon pa lang isinasama na natin sila sa bagong protocol, tugon doon sa mga bansa na nakapagreport ng UK variant," ani Duque. 

— May ulat ni Raphael Bosano, ABS-CBN News 

Bisitahin ang Patrol.PH para sa iba pang mga balita.