PatrolPH

Duterte hindi na binabalak na maunang magpabakuna kontra COVID-19

Joyce Balancio, ABS-CBN News

Posted at Jan 14 2021 05:46 AM | Updated as of Jan 14 2021 07:53 PM

Duterte hindi na binabalak na maunang magpabakuna kontra COVID-19 1
Si President Rodrigo Roa Duterte sa isang Cabinet Meeting sa Malacanang Palace. Albert Alcain, Presidential Photo/File

MAYNILA (UPDATE) — Hindi na umano binabalak ni Pangulong Rodrigo Duterte na maunang magpaturok ng bakuna kontra COVID-19 sa oras na dumating ito sa bansa.

Ayon kay Duterte, prayoridad pa rin na mabigyan ng bakuna ang mga frontliner at ibang maggagawa.

"Ang mga frontline na health workers, mauna ang teachers at social workers and other government workers, and three, essential workers outside health, education, social welfare, for example, agriculture, food, tourism and ‘yung may contact talaga sa tao. Then the socio-demographic groups at tingnan natin kung sino ang mauna sa kanila," ani Duterte sa isang talumpati na ipinalabas noong gabi ng Miyerkoles.

"Then there are the overseas Filipino workers, all remaining workers, other remaining workers, then, all remaining citizens," dagdag niya.

Magpapahuli na lang aniya si Duterte kasunod ng mga pulis at sundalo, na nasa ikalimang priority sa vaccination plan.

"Mga sundalo natin, kasama kayo sa mga priority. Pero mauna talaga ‘yong mga pobre, ‘yong wala talaga, tapos kayo," anang pangulo.

Taliwas ito sa naunang pahayag ni Duterte na puwede siyang mauna sa mga magpapabakuna para hindi matakot o mangamba ang mga tao sa pagpapaturok.

Ayon naman kay Presidential Spokesperson Harry Roque nitong Huwebes, hindi imposible na mauna si Duterte sa bakuna para lamang magbigay kumpiyansa sa publiko sa pagpapabakuna laban sa COVID-19.

Samantala, dinepensahan ni Duterte ang pagpili ng pamahalaan sa mga bakuna galing China sa harap ng mga agam-agam ng ilan na mas mababa ang efficacy rate nito kompara sa ibang bakuna.

Watch more on iWantTFC

Lumalabas kasi na ang bakunang gawa ng Sinovac ay pangalawa sa pinakamahal na bakuna pero nasa 50 porsiyento lang umano ang efficacy rate.

"The bakuna that Sec. [Carlito] Galvez is buying is a good as any other bakuna na naimbento ng mga Amerikano o iyong Europeans. Hindi nagkulang ang Chinese, hindi sila nagkulang sa utak," ani Duterte.

Iginiit din ng pangulo na pare-pareho lang ang mga bakunang dine-develop kontra COVID-19.

Sinabi rin ni Duterte na gamit na gamit na sa China ang mga bakuna ng Sinopharm at Sinovac kaya halos balik-normal na umano ang buhay ng mga taga-roon.

Tiniyak naman ng pangulo na papanagutan ang ano mang bakunang bibilhin ng gobyerno.

"Kung ano ang piliin ni Sec. Galvez, kung ano ang responsibility niya, responsibility ko rin," aniya.

Ayon kay Galvez, ang vaccine czar, isa ang Sinovac sa mga unang darating sa bansa sa Pebrero kasama ang Pfizer na galing naman sa Amerika.

Samantala, wala namang nakikitang mali si Duterte sa pagpili ng mga lokal na pamahalaan sa gusto nilang bilhing bakuna.

Tila karamihan kasi ng local government unit (LGU) na nagtabi ng pondo ay gusto ang bakuna ng AstraZeneca kahit hindi ito kasama sa mga mauunang darating sa bansa.

"You can choose any vaccine you like to buy. Wala kaming pakialam kung ano ang pipiliin ninyo," ani Duterte.

Pero iginiit ng pangulo na ang pagbili ng LGUs ay kailangan pa ding dumaan sa national government.

Target pa rin ng gobyerno na maturukan ang lahat ng 110 milyon populasyon ng bansa, pero hindi umano mamimilit ang gobyerno sa mga ayaw magpabakuna.

RELATED VIDEO

Watch more on iWantTFC
Bisitahin ang Patrol.PH para sa iba pang mga balita.