Bayanihan sa Taal eruption: Pagtatahi ng face masks, pagsagip sa mga hayop

ABS-CBN News

Posted at Jan 14 2020 03:48 PM | Updated as of Jan 14 2020 08:37 PM

Watch more in iWant or TFC.tv

Kasabay ng paghihirap na sinapit ng mga kinailangang lumikas dahil sa pag-alboroto ng bulkang Taal, umusbong din ang mga kuwento ng mga Pinoy na nagkaisa para sila ay tulungan at damayan.

Isa rito si Rosalina Mantuano, na taga-Lipa City, Batangas.

Gamit ang kaniyang husay na pananahi, gumawa si Mantuano ng dose-dosenang face mask na ipamimigay nang libre sa mga apektado ng Taal eruption.

Para kay Mantuano, laging may paraan basta gustong tumulong sa kapwa nang bukal sa kalooban.

Pero hindi lamang tao ang tinutulungan ng mga Pinoy kundi pati ang mga alagang hayop na inabandona sa gitna ng gulo.

Sa Talisay, Batangas, isa-isang sinagip ng grupong Guardians of the Fur ang mga hayop, gaya ng mga aso, na naiwan ng mga amo nitong lumikas sa pag-alboroto ng bulkan. 

Dadalhin ang mga nasagip na hayop sa isang shelter, kung saan maaari silang puntahan ng kanilang mga amo.

Binuksan naman ni Edsel Paredes ang kaniyang malaking espasyo sa Magallanes, Cavite para sa mga hayop na walang tirahan.

Maaaring magkasya sa espasyo ang 100 hayop na bibigyan ni Paredes ng libreng pagkain at tubig hangga't hindi natatapos ang krisis sa bulkan.

Nakatakda ring tumulak papuntang Tagaytay ang Taguig Rescue Team at Taguig City Social Welfare and Development Office para maghatid ng mga pagkain, hygiene kit, tubig, bigas, kape, at biskuwit sa mga nangangailangan.

-- Ulat ni Kevin Manalo, ABS-CBN News

Bisitahin ang Patrol.PH para sa iba pang mga balita.