Barangay chairman patay sa pamamaril sa Malabon

Jervis Manahan, ABS-CBN News

Posted at Jan 12 2021 05:42 AM | Updated as of Jan 12 2021 10:59 PM

Watch more in iWantTFC

MAYNILA (UPDATE) - Patay ang isang kapitan ng barangay sa Malabon matapos siya pagbabarilin sa loob ng kanilang compound Lunes ng hapon.

Nakuhanan ng CCTV kung paano pumasok sa gate ng compound ang gunman saka pinagbabaril si Anthony Velasquez ng Brgy. Hulong Duhat.

Siyam na beses nagpaputok ang gunman kaya agad na bumulagta si Velasquez na tadtad ng bala. 

Agad na tumakas ang apat na gunman sakay ng 2 motorsiklo. 

Naisugod pa sa ospital ang biktima pero dineklara siyang dead on arrival.

Nakuhanan ng CCTV ang mga salarin na riding-in-tandem na agad nakatakas.

Hindi pa tukoy ang motibo sa pamamaslang pero ayon sa mga awtoridad, dating nakasama sa narco-list si Velasquez.

Isa siya sa tatlong kapitan sa CAMANAVA na nanalo bilang barangay captain kahit nakasama ang pangalan sa narco-list, o mga opisyal na sangkot umano sa ilegal na droga.

Tumanggi namang magbigay ng pahayag ang pamilya ng chairman. 

Kinundena ng lokal na pamahalaan ng Malabon ang tumataas na bilang ng mga napapatay sa lungsod.

May ilang insidente na rin kasi ng pagpatay na naitala ngayon lang 2021.

Nababahala ang lokal na pamahalaan ng Malabon sa sunud-sunod na patayan dito sa lungsod mula pa noong isang linggo. 

Gumawa na ng Special Investigation Task Force ang Malabon PNP para imbestigahan ang mga ito. 

-- Ulat ni Jervis Manahan, ABS-CBN News

Watch more in iWantTFC
Bisitahin ang Patrol.PH para sa iba pang mga balita.