'Dispalinghadong kagamitan', dahilan umano ng pagbagsak ng crane sa Pasay City

Jeffrey Hernaez, ABS-CBN News

Posted at Jan 11 2021 09:41 PM

MAYNILA - Pumalyang kagamitan ang dahilan ng pagbagsak ng crane sa isang gusali sa Pasay City Linggo ng umaga, ayon kay City Engineer Edwin Javaluyas. 

Bumigay umano ang pagkaka-welding sa pinaka pundasyon ng crane sa ginagawang condominium dahilan para mahulog sa katabing gusali ng Lions Club. 

Ngunit ayon kay Joy Lu, General Manager ng HQC Building Equipment Corporation na contractor ng gusali, maayos ang kanilang kagamitan. Human error umano ang sanhi ng pangyayari dahil walang koordinasyon sa ground personnel ang operator ng crane. 

Pasalamat naman ang presidente ng Pasay City Hosts Lions Club na si Lydia Bueno na walang nasaktan sa insidente na nangyari pasado ala-una ng madaling araw. Inaalam pa rin ang halaga ng naging pinsala sa gusali. 

Tigil muna ang konstruksyon sa condominium hanggang hindi nakapagbibigay ang contractor ng mga bagong plano sa lokal na Pamahalaan at habang nagpapatuloy ang imbestigasyon na iniutos ni Mayor Emi Calixto. 

Tiniyak naman ng contractor na isasailalim sa training ang mga tauhan at babayaran ang may-ari ng nabagsakang gusali.

RELATED VIDEO

Watch more in iWantTFC
Bisitahin ang Patrol.PH para sa iba pang mga balita.