Ex-RCBC exec guilty sa pagkakadawit sa Bangladesh cyber heist

ABS-CBN News

Posted at Jan 10 2019 07:02 PM

Hinatulang guilty sa kasong money laundering ang dating Rizal Commercial Banking Corp. (RCBC) manager na si Maia Santos Deguito matapos idiin sa pinakamalaking cyber heist sa kasaysayan ng bansa. 

Sa hatol ni Judge Cesar Untalan ng Makati Regional Trial Court (RTC) Branch 149, guilty si Deguito sa walong counts ng money laundering. Bawat isang count ay may karampatang apat hanggang pitong taong pagkakabilanggo.

Si Deguito ang manager ng RCBC Jupiter branch na nangalaga sa mga pekeng bank account kung saan idineposito ang $81 milyon ninakaw ng mga hacker mula sa New York Federal Reserve ng Bangladesh Central Bank noong 2016. 

Sa pamamagitan ng accounts, naipasok sa bansa ang mga nakaw na pera at itinaya sa mga casino upang "linisin" at hindi na mahagilap ng mga awtoridad. 

Noong 2016, hindi pa sakop ng Anti-Money Laundering Council (AMLC) ang pagsilip sa mga transaksiyon ng mga casino. Noong 2017 ay inamyendahan ni Pangulong Duterte ang Anti-Money Laundering Act upang isali na ang mga pasugalan. 

Sa naging imbestigasyon naman ng Senado noong 2016, iginiit ni Deguito na inosente siya at hindi niya kayang gawin ang malawakang cyberheist dahil di hamak na branch manager lamang siya. 

"Truly, a crime of this magnitude could be possible only with the participation of people from the highest officialdom of the bank in cahoots with extremely wealthy businessmen whose far-reaching powers and influence span several countries," aniya. 

Sa pag-usad ng imbestigasyon, pinatawan ng Bangko Sentral ng Pilipinas (BSP) ng P1 bilyong multa ang RCBC dahil sa partisipasyon nila sa money laundering scam. 

PUMALAG

Agad namang nagbigay ng pahayag ang kampo ni Deguito ukol sa hatol, at sinabing iaapela nila ang kaso sa mas mataas na korte.

"It's not become final yet and therefore our option of filing a motion for reconsideration is still available," ayon kay Atty. Demetriou Custodio.

Sa opinyon naman ni dating senador Sergio Osmeña III na may akda ng Anti-Money Laundering Act, mahihirapan nang mabaliktad pa ng kampo ni Deguito ang desisyon.

"She doesn't have a fighting chance for reversal; she's done many things that's beyond reasonable doubt," ayon kay Osmeña.

Sa pahayag ni Bangladesh Ambassador to the Philippines Asad Alam Siam, pag-aaralan nila kung magagamit ang desisyon para mabawi ang di pa naibabalik na pera. Nais din nilang mapanagot ang iba pang opisyal ng RCBC.

"There is another case being handled by DOJ (Department of Justice) against six other RCBC officials . We hope that this case could be expedited and could go to trial soon for a decision," aniya. 

Sa pahayag naman ng RCBC, sinabi nilang alinsunod ang hatol sa posisyon nilang pawang biktima sila ng mga naging aksiyon ni Deguito.

"The conviction of Maia Deguito is consistent with the bank's position that it is the victim in this situation and that Ms. Deguito is a rogue employee," ani RCBC spokesperson Atty. Thea Daep.

—May ulat ni Jeck Batallones, ABS-CBN News

Bisitahin ang Patrol.PH para sa iba pang mga balita.