NCRPO bumuo ng task force para sa Dacera case

Zyann Ambrosio, ABS-CBN News

Posted at Jan 07 2021 02:50 PM | Updated as of Jan 07 2021 07:28 PM

Watch more in iWantTFC

MAYNILA — Bumuo ang National Capital Region Police Office (NCRPO) ng isang special task force na tututok sa kaso ng pagkamatay ng flight attendant na si Christine Dacera, sabi ngayong Huwebes ng hepe nito na si Brig. Gen. Vicente Danao Jr.

Sa panayam ng ABS-CBN kay Danao, sinabi rin nitong balewala na ang ultimatum na ibinigay ni Philippine National Police chief Gen. Debold Sinas kaugnay sa pagsuko ng mga taong idinadawit sa pagkamatay.

Inamin ni Danao na kulang-kulang ang iprinesentang ebidensiya ng mga pulis nang maghain ng reklamo laban sa mga tinuturing nilang suspek.

Hindi pa rin aniya makumpirma ang anggulo sa droga dahil hinihintay pa ang resulta ng toxicology report.

"We have to collate pieces of evidence that are lacking," ani Danao.

Magugunitang napalaya na mula sa pagkakadetene gabi ng Miyerkoles ang 3 suspek sa kaso ni Dacera, na natagpuang patay sa isang hotel sa Makati noong Enero 1.

Nagbabala si Danao na naka-monitor sila sa mga tinuturing nilang suspek sakaling may balak tumakas sa mga ito.

Nagpasalamat naman ang NCRPO sa tulong ng National Bureau of Investigation sa imbestiasyon.

"We welcome that development - NBI, lalo na kung may mga additional equipment, lalo na sa forensic pathology," ani Danao.

PAGBALIK SA CRIME SCENE

Samantala, suot ang mga personal protective equipment, 3 oras na mabusisising inimbestigahan ng NBI ang crime scene nitong Huwebes sa hotel na pinuntahan ni Dacera.

May natagpuang hair strand sa crime scene, na ayon kay NBI Deputy Director Ferdinand Lavin ay sasailalim sa laboratory examination.

Kabilang sa mga hiningi ng NBI sa hotel ay ang kopya ng mga CCTV, telephone call locks, at ang electronic lock sa mga safe o vault ng nasabing mga hotel room.

Patungo na ring General Santos City ang forensics team ng NBI para sa awtopsiya matapos iuwi roon nitong Huwebes ang labi ni Dacera.

Nag-isyu na rin ng subpoena ang NBI para sa Makati Medical Center, kung saan dinala si Dacera.

Samantala, nakipagkita naman sa Criminal Investigation and Detection Group nitong Huwebes ang mga abogado ng 3 sa mga itinurong kasama ni Dacera noong gabi bago ito matagpuang patay.

Handa raw makipagtulungan ang kliyente ng mga abogado sa kaso.

Sa paunang medico-legal report ng pulis, "ruptured aortic aneurysm" ang tinukoy nitong sanhi ng pagkamatay ni Dacera. Pero, kalaunan, sinabi ng Makati police na posibleng rape-slay ang nangyari. 

Itinanggi ng ilan sa mga itinuturing na suspek na sınaktan nila si Dacera.

RELATED VIDEO:

Watch more in iWantTFC
Bisitahin ang Patrol.PH para sa iba pang mga balita.