PatrolPH

Mga nahuling PUV na lumabag sa health protocols umabot sa 32

Anna Cerezo, ABS-CBN News

Posted at Jan 05 2022 07:21 AM

Watch more News on iWantTFC

MAYNILA—Sa unang araw ng pagpapatupad ng Alert Level 3 sa Metro Manila, umabot sa 32 PUV drivers at operators ang hinuli ng Land Transportation Office (LTO) dahil sa paglabag sa minimum health standards laban sa COVID-19.

Ayon sa LTO, ginanap ang mga operasyon Lunes sa Caloocan, Malabon, Pasay, Maynila, at Parañaque.

Inisyuhan ang mga nahuli ng show-cause order.

Sabi ng LTO, babala raw ito sa mga drayber at operator na hindi pa rin sumusunod sa mga alituntunin na inilabas ng transportation department, tulad ng 70% passenger capacity limit.

Ang paghihigpit kasi ay dahil sa biglaan at mabilisang pag sirit ng COVID-19 sa bansa.

Daing naman ng ilang drivers, nahirapan sila pigilan ang bugso ng mga pasahero, lalo na kapag rush hour. 

Ayon kay Dione Dayola, presidente ng mga bumabyaheng jeep papuntang Agoncillo at Guadalupe, mahigpit nilang ipinapatupad ang 70% sa kanilang terminal.

Aalis ang mga jeep na tig-7 ang pasahero sa magkabilaang upuaan, at isa sa harapan.

Pero pagdating ng PRC, Delpan, at Rockwell, hindi na raw nila napipigilan ang mga tao na biglang sasabit o sasakay kasabay ng bababang pasahero.

Noon umanong may plastic barriers pa, mas nasusunod ang maximum passenger capacity, dahil ito ay nagsisilbing harang.

Gayunpaman, nagbabala na ang Land Transportation Franchising and Regulatory Board na ang hindi pagsunod ay paglabag sa franchise conditions at maaaring maging dahilan ng pagsuspinde sa prangkisa.

Paalala pa ng LTO sa mga operator, driver at pati na rin pasahero:

  • Laging magsuot ng face mask;
  • Bawal magsalita at makipag-usap sa telepono;
  • Bawal kumain;
  • Laging panatilihin ang maayos at sapat na ventilation sa mga PUV;
  • Laging magsagawa ng disinfection;
  • Bawal sumakay ang mga pasaherong mayroong sintomas ng COVID-19 sa pampublikong transportasyon; at
  • Laging sundin ang panuntunan sa physical distancing
Bisitahin ang Patrol.PH para sa iba pang mga balita.