Duterte sa PSG: 'Wag sumipot, magsalita kung ipatawag sa Kongreso dahil sa COVID-19 vaccination

ABS-CBN News

Posted at Jan 05 2021 01:21 PM | Updated as of Jan 05 2021 07:52 PM

Nakapalibot kay Pangulong Rodrigo Duterte ang mga miyembro ng Presidential Security Group sa Batasang Pambansa, Quezon City, Hulyo 20, 2020. Presidential Photo/File

MAYNILA (UPDATE) — Inihayag ni Pangulong Rodrigo Duterte noong Lunes na inutusan niya ang Presidential Security Group (PSG) na huwag sumipot sakaling ipatawag ng Kongreso kaugnay sa pagpapabakuna laban sa COVID-19.

Sa talumpati, sinabi ni Duterte na hindi na rin dapat ipilit ng mga mambabatas na padaluhin ang mga taga-PSG sa pagdinig tungkol sa COVID-19 vaccine dahil uutusan lang niya ang mga ito na itikom ang kanilang mga bibig.

"I am not so keen about allowing [PSG Commander Jesus] Durante and the rest of the PSG to testify," ani Duterte.

"Durante, do not obey the summons. I am ordering you to stay put in the barracks," sabi ng pangulo.

Nagbanta rin ang pangulo na magkakagulo sakaling pilitin ng Kongreso na paharapin sa pagdinig ang mga taga-PSG para pagpaliwanagin.

Bagama't nirerespeto umano niya ang separation of powers ng ehekutibo at lehislatura, kinukuwestiyon niya kung bakit pa kailangang imbestigahan ang isyu.

Kamakailan, nadawit sa kontrobersiya ang PSG matapos lumabas na naturukan na ang ilan sa kanila ng COVID-19 vaccine kahit wala pang inaaprubahang bakuna ang Food and Drug Administration dito sa bansa.

Watch more in iWantTFC

Iginiit din ng pangulo na wala siyang alam sa pagpapabakuna ng PSG at hindi rin niya umano ito iniutos.

"I don’t know really if they were injected with the vaccine, what brand, hindi ko alam... do not presume na sabi kino-cover up," aniya.

Taliwas ito sa sinabi ni Duterte noong Disyembre 26, kung saan siya mismo ang nagsabi na bakuna ng Sinopharm ng China ang naiturok na sa ilang sundalo. 

Dinepensahan din ng pangulo ang PSG at sinabing mahalaga ang pagbabakuna sa pagganap ng kanilang tungkulin.

"How can I survive if wala akong close-in to guard me... to prevent untoward, you know, incidents?" aniya.

Binatikos din ni Duterte ang mga pumuna sa gobyerno dahil sa hindi pagsunod sa mga prayoridad na mabakunahan base sa inilabas na vaccine roadmap.

"Hindi ito para sa inyo na magyawyaw kayo... Ang military at ang pulis ang mauna kasi 'pag mawalaan tayo ng pulis pati military, out of control ang bayan," aniya.

Samantala, inihayag naman ni Food and Drug Administration Director General Eric Domingo na posible namang magbigay ng permit sa bakunang kailangan ng PSG.

"If it is going to be a smaller group po, for example iyong PSG and, of course, priority naman talaga nila na kayo ay maproteksiyunan, then we can give compassionate special permit for this," ani Domingo.

Ipinaliwanag ni Domingo na para sa maliit na grupo gaya ng PSG, hindi na kailangan ng emergency use authorization at maaaring payagan na lang ang isang ospital na pangunahan ang pagtuturok ng bakuna.

Nilinaw naman ni Presidential Spokesperson Harry Roque na walang gag order ang PSG.

Hindi umano pinipigilan ng pangulo ang PSG na humarap sa ibang imbestigasyong gagawin ng executive department.

Pagdinig sa Senado di tungkol sa PSG

Samantala, matapos ang banta ng pangulo ukol sa gulo sa pagitan ng ehekutibo at lehislatura, iginiit ni Senate President Vicente Sotto III na tila "misinformed" ang pangulo.

Ayon kay Sotto, ang nakatakdang pagdinig ng Senado ay tungkol sa roadmap o plano ng gobyerno sa pagbili, pag-imbak at pag-distribute ng COVID-19 vaccines. 

Watch more in iWantTFC

Kinuwestiyon ni Sotto kung bakit tila iniiba ng ilan ang topic ng pagdinig at nilinaw ring walang iimbitahan sa PSG.

Ayon kay Sen. Panfilo Lacson, puwede pa ring itanong sa pagdinig ang pagbakuna ng PSG pero mas importante ang immunization para sa milyon-milyong Pilipino.

"Hindi rin dapat manghimasok ang Malakanyang sa tungkulin ng Senado o Kongreso na kung kami ay mayroong pagdinig ay uubra naman kami'y magpatawag ng mga resource persons," ani Lacson.

"Kapag tinawag namin ang resource person, hindi naman ibig sabihin mga suspect 'yon, gusto lang nating maliwanagan," aniya. 

Sinabi naman ni opposition Senator Francis "Kiko" Pangilinan, na naghain ng resolusyon para sa imbestigasyon sa vaccine program ng gobyerno, na layon ng hearing na alamin ang kongkretong plano sa vaccine rollout.

Ang usapin ng PSG ay nasa mga senador na aniya kung may tututok o wala.

Para naman kay Senate Minority Leader Franklin Drilon, pag-invoke ng executive privilege ang ginawang pagpigil ng pangulo sa PSG na dumalo sakaling ipatawag sa pagdinig.

Kinikilala aniya itong kapangyarihan ng pangulo pero ang "investigation in aid of legislation" ng Kongreso ay kinikilala ring legislative power kaya walang makakapigil sa Kongreso na mangalap ng impormasyon mula sa resource persons.

Ayon naman kay Sen. Risa Hontiveros, hindi puwedeng pabayaan na lang ng gobyerno ang napabalitang pagpapabakuna ng Philippine offshore gaming operator workers dahil malinaw na paglabag ito sa batas. 

Tinanong din ni Hontiveros kung bakit inaaresto o kinukulong ang simpleng mamamayan na walang mask o um-attend ng party samantalang kapag Chinese o opisyal ng gobyerno na gumamit ng ilegal na bakuna ay pinagtatakpan o pinalulusot.

Lumalabas tuloy na kunsintidor ng kontrabado ang gobyerno, ayon kay Hontiveros.

Hindi naman nagbago ang pasya ng National Bureau of Investigation na imbestigahan ang kontrobersiya ng PSG.

Ayon naman kay Armed Forces of the Philippines (AFP) spokesperson Edgard Arevalo, ipinag-utos na ni AFP Chief Gen. Gilbert Gapay na huwag nang ituloy ang pag-imbestiga hinggil sa pagbabakuna sa PSG.

Naghain naman ang Makabayan bloc sa Kamara ng resolusyon para imbestigahan ang vaccination ng PSG.

— Ulat nina Joyce Balancio at Robert Mano, ABS-CBN News

Bisitahin ang Patrol.PH para sa iba pang mga balita.