Lalaki timbog sa pagnanakaw umano sa kaibigan sa Maynila

ABS-CBN News

Posted at Jan 04 2021 12:58 PM | Updated as of Jan 04 2021 02:06 PM

Huli ang isang lalaki na nagnakaw umano ng cellphone at bisikleta sa kaniyang kaibigan. Retrato mula sa Manila Police District Public Information Office​

MAYNILA — Arestado ang isang 20 anyos na lalaki matapos pagnakawan ang sariling kaibigan sa Santa Ana district ng lungsod na ito, sabi ngayong Lunes ng pulisya.

Ayon sa Manila Police District, nag-agahan ang magkaibigan sa isang karinderya sa may kanto ng Mabuhay at Tejeron Street bago tinangay ng suspek ang hiniram na bisikleta at cellphone ng biktima.

Watch more in iWantTFC

Humingi ng tulong ang biktima sa mga awtoridad matapos ang pagnanakaw.

Natunton ang suspek sa isang convenience store sa Makati pero hindi na umano nabawi ang mga ninakaw na item.

Tanging earphones na lang ng biktima ang narekober sa suspek, sabi ng pulisya.

Nahaharap sa kasong theft ang suspek, na ngayo'y nasa kustodiya ng mga awtoridad.

— Ulat ni Lady Vicencio, ABS-CBN News


FROM THE ARCHIVES:

Watch more in iWantTFC
 
Bisitahin ang Patrol.PH para sa iba pang mga balita.