Bagong pag-asa? Kilalanin ang ‘new year baby’ ng 2022 sa Fabella hospital

ABS-CBN News

Posted at Jan 01 2022 10:48 AM

Watch more News on iWantTFC

MANILA—Sinalubong ng 21-anyos na si Catherine Llantos ang 2022 nang may bagong pag-asa.

Mga 11 minuto makalipas ang hatinggabi Sabado isinilang ni Llantos ang anak na babeng si Alexa sa Dr. Jose Fabella Memorial Hospital sa Santa Cruz, Manila.

Ayon kay Llantos na isang single mother, si baby Alexa ang sagot sa kaniyang mga panalangin.

Dahil sa pandemya, nawalan ng kabuhayan si Llantos at maging ang kaniyang pamilya.

"Walang wala po kasi kami ngayon. Nawalan rin ng trabaho si nanay, ta’s iniwan kami ng tatay niya. Maswerte din talaga na ngayon ako nanganak,” aniya.

Pero dahil new year baby si Alexa, hindi na kailangang pagkagastusan ni Llantos ang kaniyang panganganak. 

“Wala silang babayaran. Kumbaga kasi, ’yan na lang din kahit papano ang maireregalo namin sa kanila,” ayon kay Dr. Rosemarie Vaquilar.

Umaasa si Llantos na ang pagsilang ni Alexa ay maging simula rin ng mas magandang buhay para sa kanilang pamilya.

"’Pag pwede na iwan si baby, maghahanap na ulit ako ng trabaho,” aniya.

Bukod pa kay Alexa, may 5 sanggol na isinilang sa Fabella hospital, as of 5 a.m.