Pitong taon nang nagtatrabaho bilang utility worker ang 54 taong gulang na si Julieta Vergara.

Isinasabay niya na rin ngayon ang pagiging estudyante sa eskwelahan kung saan siya namamasukan.

Kwento niya, "gusto ko talaga makapagtapos ng pag-aaral kahit nag-asawa na ako at nagkaron na ng anak,  para hindi ako habang buhay utility, hindi lang po ako habang buhay job order. Gusto ko pa rin maging regular at permanent na empleyado."

Sinuwerteng naging scholar si Aling Julieta sa ilalim ng programa ng LGU na tumutulong sa mga government workers na makapag-aral.

Kumuha si Aling Julieta ng Bachelor in Public Administraion at magtatapos na sa susunod na taon.

Sa ngayon, ang hindi raw kayang isabay ni Aling Julieta ay ang pagpapa-aral sa kanyang mga anak, kaya’t huminto muna ang mga ito sa pagpasok sa eskwela.

"Sabi ko nga, ako muna magtatapos. Sabi ko nga, ako nga may edad na nag-aaral pa rin di ba? So sila din di ba, di pa naman huli ang lahat." ani aling julieta

Sa kanyang pamilya humuhugot ng lakas ng loob si aling julieta na magpatuloy sa buhay. Patunay siya na hindi dapat basta-basta sinusukuan ang mga pangarap. — Ulat ni Jervis Manahan para sa programang Tao Po. (August 25, 2024)

Mapapanood ang mga episode ng Tao Po dito.