ALAMIN: Mga hanapbuhay na tiba-tiba ngayong Pasko

ABS-CBN News

Posted at Dec 22 2019 06:48 PM

Watch more in iWantTFC

MAYNILA — Mahigit 3 dekada na sa paggawa ng parol si Roland Quiambao, na taga-San Fernando Pampanga.

Noon, tagakumpuni lamang siya ng parol ng mga kapitbahay pero matapos ang ilang taong pagsisikap ay nakapagtayo siya ng sariling pagawaan.

"Kailangan matiyaga ka, hindi puwedeng nagmamadali, very labor intensive siya kasi handmade siya," ani Quiambao.

"Kapag nakikita kong naaaliw ang tao, masaya na rin ako kasi kung wala man laman ang bulsa niya, at least ang mata niya busog."

Takbuhan naman ang tulad ni Margareth Cid ng mga walang panahon sa pagbabalot ng regalo.

Limang taon nang nagbabalot ng regalo si Cid sa isang toy store, at umaabot daw sa mahigit 100 ang nababalot na regalo niya kada araw tuwing panahon ng Pasko.

"Mayroon akong part doon na kapag binigay mo 'yung item sa bata nakikita mo na masaya sila," ani Cid.

Dalawang dekada naman nang gumagawa ng hamon si Sally Syyap, na mayroon umanong sikreto sa kaniyang recipe kaya ito binabalik-balikan.

"Parang 'di kumpleto ang Pasko kapag wala akong nakikitang hamon sa mesa," aniya.

Higit sa palamuti at materyal na bagay, mas malalim pa para kina Quiambao, Cid, at Syyap ang kahulugan ng Pasko dahil kasama sila sa pagbuo nito.

-- Ulat ni Zen Hernandez, ABS-CBN News

Bisitahin ang Patrol.PH para sa iba pang mga balita.