PatrolPH

Higanteng Christmas tree at water fountain binuksan na sa publiko sa Antipolo City

Anjo Bagaoisan , ABS-CBN News

Posted at Dec 01 2021 07:42 AM

Watch more on iWantTFC

MAYNILA - Bida sa pamaskong display ng Antipolo City sa Rizal ngayong taon ang higanteng Christmas tree na gawa sa recycled materials at LED fountain.

Sentro ng atraksyon sa Sumulong Park ang 44-foot-tall Christmas tree na binuo ang katawan mula sa 37,000 na plastic bottles.

Pinalamutian ito ng mga bulaklak na iba-ibang kulay ang ilaw at pinalibutan ng tila pulang laso.

Hope o pag-asa ang tema nito bukod sa pag-iingat sa kalikasan.

Nasa ilalim naman ng puno ang isang belen o Nativity scene.

Sinabayan ng fireworks display ang pagpapailaw ng lungsod sa liwasan noong Lunes.

Ayon sa lokal na pamahalaan, pagbibigay-kasiyahan din ito sa publiko na muli nang nakakalabas matapos ang mahigit isang taon ng pandemya.

Bida rin sa park ang makulay at bagong-bukas na water fountain sa tapat ng Christmas tree na pwedeng mapanood ng mga bata.

Limang beses mapapanood ito sa maghapon ng kada 30 minuto tuwing 8 a.m., 10 a.m., 12 p.m. at 5 p.m. at 2 oras mula 6 hanggang 8 p.m..

Bukas ang Sumulong Park mula alas-8 ng umaga hanggang alas-8 ng gabi. 

Ayon pa sa lokal na pamahalaan, maaari ring pumunta roon ang mga taga-Metro Manila dahil na rin sa pag-abot ng Antipolo sa herd immunity o 70 porsyento ng target population para sa bakuna. 

Bisitahin ang Patrol.PH para sa iba pang mga balita.