UP alumni may fundraiser para sa mga tsuper ng ‘Ikot’

ABS-CBN News

Posted at Sep 12 2020 08:03 PM | Updated as of Sep 12 2020 08:29 PM

Layon ng Pantawid sa mga Naghahatid na makakalap ng pondo upang masuportahan ang mga UP Ikot drivers. Screenshot

Hinatiran ng ayuda ang mga tsuper ng rutang UP Ikot na apektado sa coronavirus disease 2019 (COVID-19) pandemic, sa bisa ng isang fundraising project.

Nagawa ito sa bisa ng Pantawid sa mga Naghahatid project na binuo ng ilang alumni. Layon nitong makakalap ng pondo upang masuportahan ang mga UP Ikot drivers.

Hunyo nang simulan nila ang proyekto at nakakalap ito ng mahigit P2.5 milyon.

P2,000 ayuda ang ibinibigay sa mga tsuper kada buwan sa loob ng 3 buwan.

Watch more in iWant or TFC.tv

Ang pondong natira, gagamitin para sa mga susunod na ayuda.

Maaalalang suspendido ang face-to-face learning at limitado ang pampublikong sasakyan dahil sa pandemya.

Isa sa mga nagbigay si Peng Tuazon, isang UP alumnus, na nagpasalamat sa mga nagpaabot ng tulong.

“Very emotional ang naging response ng mga tao, sila ang mga tumulong,” ani Tuazon.

Malaki naman ang pasasalamat ng tsuper na si Romy Pascua at ng kaniyang kasamahan na hindi sila pinabayaan ng mga itinuring na “iskolar ng bayan.”

“Kami po ay nagpapasalamat at nami-miss na po namin kayo na maisakay na muli at makapaglingkod po sa inyo,” ani Pascua, dalawang dekadang pumapasada sa naturang ruta.

Sa mga nais magpahatid ng tulong, makipag-ugnayan lamang sa Facebook page ng Pantawid Para sa mga Hinahatid.

— Ulat ni Jeffrey Hernaez, ABS-CBN News

Bisitahin ang Patrol.PH para sa iba pang mga balita.