Watch more in iWantv or TFC.tv

Dapat agad na magpakonsulta sa doktor kapag nakaranas ng pagkakaroon ng dugo sa ihi, lalo na ang mga matatanda, ayon sa isang urologist.

Mainam na magpatingin sa espesyalista ang mga taong nakaranas ng hematuria, o iyong pagkakaroon ng dugo sa ihi, dahil maaaring sintomas ito ng pagkakaroon ng kanser sa urinary tract o daanan ng ihi, sabi sa DZMM ni Dr. Pedro Lantin III.

"Dapat magsuri na lalo na sa adult kasi more often than not, it can be cancer," sabi ni Lantin sa programang "Good Vibes."

Puwedeng kanser ang dahilan ng pagdurugo kapag wala raw naramdaman na pananakit sa pag-ihi ang pasyente.

Ilan sa mga kanser na maaaring magdulot ng pagdurugo sa ihi ay kanser sa bato o kidney, pantog, urethra, at prostate sa lalaki.

"Almost all cancers ng urinary tract can cause bleeding," aniya.

Maaari ring magdulot ng pagdurugo ang mga impeksiyon sa daluyan ng ihi, at pagkakaroon ng stones o bato, ayon kay Lantin.

Ipinaliwanag din ni Lantin na may mga sanhi rin ng pagdurugo na walang kinalaman sa daluyan ng ihi gaya ng pag-inom ng gamot at pag-eehersisyo.

Mahalaga umanong alam ng pasyente kung saan nanggaling ang pagdurugo, ani Lantin.

Kapag sa upper urinary tract ang problema, makararamdam daw ang pasyente ng sakit sa apektadong bahagi.

"Vermiform clots" o dugong mala-bulate o spaghetti ang nasa ihi kapag nasa upper urinary tract daw ang problema.

Kapag galing sa pantog ay kadalasang namuong dugo umano ang makikita sa ihi.

Masasabi naman daw na sa urethra galing ang dugo kapag ito ay walang masyadong pamumuo.