PatrolPH

Birthday celebrant nagpa-burger sa community pantry sa Muntinlupa

Anjo Bagaoisan, ABS-CBN News

Posted at Apr 30 2021 04:45 PM

Birthday celebrant nagpa-burger sa community pantry sa Muntinlupa 1
Larawan mula sa Feed It Forward PH

MAYNILA — Namigay ng libreng burger ang isang birthday celebrant sa isang community pantry sa harap ng St. Peregrine Shrine ng Barangay Tunasan, Muntinlupa nitong Miyerkoles.

Kwento ni Jayson Villeza, isa sa mga nag-organisa ng stall sa lugar, sarado talaga sila sa araw na iyon at nagulat na lamang sa binigay na donasyon. 

Aniya, agad silang nagbukas muli ng at kumuha ng mga table para ipamigay ito. 

“Bigla na lang may nagpadala ng burgers e wala po kaming schedule noong Wednesday. Pati kami nasurpresa,” kwento ni Villeza sa ABS-CBN News

“Kaya agad-agad naglagay ng mesa doon sa may St. Peregrine Shrine para ipamigay ‘yung two boxes ng burgers.”

Si Villeza ay nagtayo ng community pantry kasama ang ilang professionals sa Muntinlupa.

Simula nang umusbong ang community pantry sa Maginhawa Street sa Quezon City, daan-daang mga Pilipino ang nakilahok para makatulong sa kapwa.

Layunin ng community pantry na makapagbigay ng tulong sa hapag-kainan ng mga pamilya sa gitna ng pandemya. 

Bisitahin ang Patrol.PH para sa iba pang mga balita.