Grupo ng dancing food delivery riders kinagigiliwan ngayon sa TikTok

ABS-CBN News

Posted at Apr 24 2021 08:27 PM

Watch more in iWantTFC

Good vibes ang hatid ng isang grupo ng food delivery riders na humataw sa pagsayaw sa isang video sharing app.

Umani ng milyon-milyong views ang video ng "San Pedro City (SPC) Dancing Riders" sa sikat na video sharing app na TikTok. 

"Parang iisa lang po talaga yung passion namin tapos nagkasama-sama kami sa trabaho, then one time nagkayayaan po sa TikTok. Hindi naman po namin ine-expect na maraming po talagang matutuwa, kaya po diniretso na po namin," ani Jomak Peladra, isa sa mga rider. 

Matatandaang tumaas ang demand ng mga delivery, ngayong nililimitahan ang paglabas ng mga tao habang may pandemya. 

Ayon sa grupo, paraan nila ito para aliwin ang mga sarili habang naghihintay ng mga order at makakapagsaya ngayong may coronavirus disease (COVID-19) pandemic. 

“Kaya po namin ginagawa ito, katulad nga po ngayon na pandemic po, alam naman po natin na halos lahat tao po ay medyo stressed po sa nangyayari po dito sa atin," ani Angelito Mañores na isa ring miyembro ng grupo.

"Kaya po yung naisipan po naming lahat na gawin po itong pagti-TikTok para yung good vibes po, mai-share po namin sa mga kababayan natin na medyo nalulungkot."

May 297,000 followers na ang grupo sa TikTok at kaliwa’t kanan din ang connection request sa kanila ng mga netizen. 

Nanawagan din sila na tigilan ang pekeng booking sa mga kapwa nilang delivery rider. 

“Tigilan po nila saka po sana maging patas po sila sa buhay lalo po yung buhay po natin ngayon medyo mahirap, so sana tigilan na po nila yun kasi hindi po nakakatulong para sa amin saka po ang laking perwisyo po sa mga delivery riders,” ani Peladra. 

-- Ulat ni Jeffrey Hernaez, ABS-CBN News

Bisitahin ang Patrol.PH para sa iba pang mga balita.