ALAMIN: Ano ang ADHD?

ABS-CBN News

Posted at Apr 20 2019 12:44 PM

Hindi ba mapakali ang iyong anak o kadalasa'y may nakakalimutang kaibigan? 

Maaari iyang sintomas ng Attention Deficit Hyperactivity Disorder (ADHD) o kondisyon kung saan may kakulangan sa brain structure, na nagdudulot ng labis na pagkabalisa o kawalan ng kakayahang mag-focus ng isang indibidwal. 

Ayon sa pediatrician na si Francis Xavier Dimalanta, may tatlong klase ng ADHD na maaaring makita sa mga kabataan. 

Una ay ang ADHD-inattentive type (ADHD-IA), kung saan madali umanong nadi-distract ang isang may ADHD. 

Sumunod naman ang ADHD-hyperactive type (ADHD-HI) o tipo na labis na hindi mapakali ang indibidwal.

Mayroon ding ADHD combined type (ADHD-CT) kung saan nararanasan ng may ADHD ang sintomas ng ADHD-HI at ADHD-IA. 

Dama ang mga sintomas mula sa pagkabata pero ayon kay Dimalanta, may mataas na tsansang dalhin ng bata ang sintomas paglaki nito.

"Pagkalaki niya, kahit ilang beses, nawawalan siya ng gamit, madaling ma-distract ng mga noises, galaw nang galaw, alam mo 'yung para kang kiti-kiti, salita ka nang salita, at hindi ka makasingit," ani Dimalanta. 

Ayon din sa doktor, may kasama pang ibang karamdaman ang ADHD tulad ng oppositional defiant disorder o ang pagsalungat sa mga nakatatanda o authority figures, pagkakaroon ng conduct disorder, at pagkaramdam ng pagkabalisa o anxiety. 

Maaring maapektuhan ng kondisyon ang grado ng bata sa klase, maging ang pakikisalamuha nito sa pamilya. Kaya hinikayat niyang tratuhin ang anak na may ADHD nang tulad ng normal na bata. 

"Treat [the child] like any other child. Dapat alam ng bata na dapat andu'n ang pamilya para suportahan. Dapat pareho ang pag-respond sa kaniya para di siya malito. Things have to be in place," ani Dimalanta. 

Bisitahin ang Patrol.PH para sa iba pang mga balita.