PatrolPH

#SaveSanSebastian online campaign inilunsad

ABS-CBN News

Posted at Jan 13 2021 05:45 AM | Updated as of Jan 13 2021 11:01 AM

Watch more on iWantTFC

MAYNILA - Nagbigay ng suporta ang Manila Cathedral sa "Save San Sebastian" movement para sagipin ang makasaysayang simbahan ng San Sebastian sa Maynila. 

Nakiisa ang Manila Cathedral sa change.org online signature campaign at inaanyayahan ang publiko na sumali rin. Ang petisyon na nailunsad ngayong buwan lang ay layong mapatigil ang konstruksyon ng mataas na condominium sa likod ng simbahan. 

Ayon sa San Sebastian Basilica Conservation and Development Foundation, "hinihiling namin sa inyo na manindigan kasama kami ang aming mga kasosyo upang itaas ang kamalayan tungkol sa San Sebastian at kung bakit dapat ito protektahan."

Kasali din sa petisyon ang tuluyang pag restore at pagsasaayos sa simbahan na tinaguriang "the only all steel church in Asia" at dineklara rin ng gobyerno na "National Historical Landmark" at "National Cultural Treasure". 

Isa rin ito sa mahahalagang gusali sa Quiapo District na dinadaanan rin ng Traslacion taon-taon. 

Pag itinayo aniya ang 31-storey condominium project sa likuran ng simbahan, masisira umano ang historical at cultural value ng simbahan at ng paligid nito. Dagdag pa ng cultural heritage preservation group na Kapitbahayan sa Kalye Bautista, hindi sila kontra sa development pero dapat aniya ay unahin ang pagprotekta sa kasaysayan at heritage ng bansa. 

Aniya, ang condo project ay magiging photobomber pa. 

Umaasa ang ibat ibang grupo na umabot sa 400,000 na mga lagda ang petisyon sa change.org.

Bisitahin ang Patrol.PH para sa iba pang mga balita.