PatrolPH

Pasyalan sa Tagaytay dinagsa sa unang araw ng 2022

Anjo Bagaoisan, ABS-CBN News

Posted at Jan 01 2022 05:10 PM

MAYNILA — Pami-pamilya at magbabarkada ang dumagsa sa Picnic Grove sa Tagaytay City sa unang araw ng 2022 nitong Sabado.

Habol ng marami ang malamig at mahanging panahon kaya daan-daan ang namasyal at nananghalian sa park na may overlooking view ng Taal Lake.

Nagdala ng sariling pagkain ang mga dumayo at doon na pinagsaluhan.

Maagang napuno ng tao ang mga hut at cottage sa Picnic Grove kaya naglatag ang iba ng mga banig o nagtayo ng mga tent sa damuhan.

Naglaro ang maraming bata sa open-air spaces nito at nagpalipad ng saranggola. Patok din ang mga atraksyong ferris wheel at zipline.

Ito ang unang bagong taon sa loob ng 2 taon na nakapamasyal ang marami sa Picnic Grove, na isa sa mga naapektuhan ng pagputok ng Bulkang Taal at pagsimula ng pandemya noong 2020.

Dahil naman sa dami ng tumungo sa lugar pati na sa ibang bahagi ng Tagaytay, matindi ang traffic sa highway patungo sa mga pasyalan.

Bisitahin ang Patrol.PH para sa iba pang mga balita.