PatrolPH

Ice Seguerra at Liza Diño, nagdiwang ng kanilang ika-7 anibersaryo bilang mag-asawa

ABS-CBN News

Posted at Dec 08 2021 03:23 PM | Updated as of Dec 08 2021 03:25 PM

MAYNILA -- Ipinagdiriwang nina Ice Seguerra at Liza Diño ngayong Disyembre 8 ang kanilang ika-7 anibersaryo bilang mag-asawa.

Sa Instagram nitong Miyerkoles, idinaan sa tula ni Diño ang mensahe niya kay Seguerra para sa espesyal nilang araw.

Narito ang tula ni Diño para kay Seguerra na isinulat niya sa kanilang ika-7 taon nila bilang mag-asawa.

IKAW AT AKO, PITONG TAON NA TAYO
By Liza Dino-Seguerra

Tatlong beses mag-post ng "happy monthsary" sa isang buwan
5, 8, 14… walang katapusang aylabyuhan
Nagpapasiklaban sa paghayag
nang ating pag-iibigan
Mula tula, hanggang katha,
hindi nauubusan

Ngunit lumipas ang mga taon
unti-unting nabawasan.
3,2,1… minsan pa’y nakakalimutan
Mga post natin dati, ngayon
mangilan-ngilan na lamang
Wala na nga bang time kahit ilabyu
man lang?

Nagtatampo, nasasaktan, minsan naaapektuhan
Pareho pa rin kaya ang nararamdaman?
Ano nga ba ang sukatan nang
tunay na pagmamahalan?
Kailangan bang ipagsigawan
Para lang mapatunanayan?

At dun din natanto, mga sagot
sa tanong ko
Diyos ko, mahal ko pitong taon na tayo
Di man alam ng mundo kung ano ang
ating kwento
Kailanma'y di nagbago, kinikilig pa rin
ako sa 'yo

Binuhay, nabuhay nang pagmamahal mo
Walang katumbas, langit sa piling mo
Sa hirap at ginhawa magkasama tayo
Ikaw at ako, mahal ko, habambuhay na' to."

Matatandaang ikinasal sina Diño at Seguerra sa California noong December 2014.

Muli silang nagpalitan ng sumpaan sa isang "symbolic ceremony" na ginanap naman sa Batangas noong Enero 2015.

Related video:

Watch more on iWantTFC
Bisitahin ang Patrol.PH para sa iba pang mga balita.