Liza Soberano sumagot sa basher na tumawag sa kaniyang 'boba'

ABS-CBN News

Posted at Sep 08 2020 02:38 PM

 
 
 
 
 
 
 
 
 
 
 
 
 
 
 

A post shared by Liza Soberano (@lizasoberano) on

MAYNILA - Sumagot si Liza Soberano sa isang netizen na tumawag sa kaniyang "boba" kasunod ng pagkuwestiyon niya sa pagbibigay ng absolute pardon sa isang Amerikanong sundalo na na-convict sa pagpatay sa isang transpinay.

Kinuwestiyon ng 22 anyos na aktres sa Twitter noong gabi ng Lunes ang pasya ng gobyerno na palayain si US Marine Lance Corporal Joseph Scott Pemberton matapos siyang gawaran ng absolute pardon ni Pangulong Rodrigo Duterte.

Kinuwestiyon din ni Soberano kung patas bang pinatay si Jennifer Laude dahil sa sexual orientation nito. 

Ito ay matapos sabihin ni Duterte na kaya nabigyan ng pardon si Pemberton ay dahil hindi raw naging patas ang pagtrato sa dayuhang sundalo.

Ginamit din ni Soberano ang mga hashtag na #JusticeForJenniferLaude at #TransLivesMatter sa kaniyang tweets.

Isang netizen naman ang nag-reply sa tweet ni Soberano at tinawag na boba ang aktres.

"Ang boba pala ng babaeng ito. Now naniwala na talaga akong acting lang ['yong] kunwaring matalino [siya]," sabi ng netizen.

"Stick to your craft girl. [Huwag] masyadong pahalata na wala kang alam sa basic conprehension on laws & current events," dagdag ng netizen.

Tila sarcastic naman si Soberano nang sagutin niya ang tweet ng netizen.

"Ouch ang sakit nasaktan ako," sabi ng aktres.

Bukod kay Soberano, sari-saring grupo na rin ang kumuwestiyon at kumondena sa pagbibigay ni Duterte ng pardon kay Pemberton.

Tinawag pa ng grupong Bagong Alyansang Makabayan na pagtataksil sa bayan ang ginawa ng pangulo.

Oktubre 2014 nang matagpuan ang bangkay ni Laude, na nakasubsob ang ulo sa inidoro, sa loob ng isang motel room sa Olongapo City.

Base sa court records, nagsama sa kuwarto si Pemberton at Laude. Lumabas mag-isa si Pemberton bago natagpuan ang bangkay ni Laude.

Makalipas ang higit isang taon, binasahan ng sakdal si Pemberton: guilty sa homicide at sinintensiyahan ng 6 hanggang 12 taong pagkakakulong na kalaunan ay ibinababa sa 10 taon.

Bisitahin ang Patrol.PH para sa iba pang mga balita.